Saǵyntaev Almaty turǵyndaryna óz aýdanyn kórkeıtýge belsendi at salysýǵa shaqyrdy
ALMATY. QazAqparat - Almaty ákimi Baqytjan Saǵyntaev qala turǵyndaryn óz aýdanynyń kórkeıýine belsendi at salysýǵa shaqyrdy, dep habarlaıdy QazAqparat tilshisi.
Qala ákimi Baqytjan Saǵyntaev Instagram-daǵy paraqshasynda jańarǵan aýlalar men jaıaý júrginshi aımaqtarynyń qoǵamdyq keńistik ajaryn asha túskenin aıtty.
«Aýdanǵa jasaǵan jumys sapary kezinde aýmaqtardy ózgertýge keshendi túrde qarap, shań-tozań bolmaý úshin barlyq bos ýchaskelerdi barynsha kógaldandyrýdy tapsyrdym. Bıyl aýdanda 205 aýla, 9 skver jóndelip, 5 bos ýchaske, 2 jaǵalaý aımaǵy abattandyryldy. №10 yqshamaýdandaǵy jaıaý júrginshiler aımaǵy jóndelip jatyr», - dep jazdy Almaty ákimi.
Qala ákimi bul jumystardyń barlyǵy turǵyndarmen ótken esep berý kezdesýinde aıtylǵan ótinishter boıynsha jasalǵanyn atap ótti.
«Adamdardyń kóńil-kúıiniń qalaı jaqsaryp jatqanyn baıqaý qıyn emes. Yqshamaýdandar ómir súrýge yńǵaıly bolyp túrlendi. Yńǵaıly oryndyqtar, oıyndarǵa arnalǵan ústelder, balalar alańdary turǵyndarǵa uzaq qyzmet eteri sózsiz», - dedi ol.
B. Saǵyntaev qala turǵyndary burynǵysha ózderi turatyn jerdi abattandyryp, gúlder men aǵashtar otyrǵyzýdy qolǵa alsa degen usynysyn bildirdi.
«Tártipti saqtap, balalarymyzǵa qalamyzǵa uqypty qaraýdyń úlgisin kórseteıik», - dedi megapolıs ákimi.
