Saǵyntaev Almaty oblysy jurtshylyǵymen óńirdi damytý máselelerin talqylady
ASTANA. QazAqparat - QR Premer-Mınıstri Baqytjan Saǵyntaev Almaty oblysyna jumys sapary kezinde óńir jurtshylyǵymen oblysty odan ári áleýmettik-ekonomıkalyq damytý, sonymen qatar Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýy men «Bolashaqqa baǵdar: qoǵamdyq sanany jańǵyrtý» baǵdarlamalyq maqalasynda alǵa qoıǵan mindetterin iske asyrý máseleleri jóninde kezdesý ótkizdi.
Qatysýshylar kezdesý aıasynda óńirdi damytýdyń ózekti máselelerin talqylady, solardyń ishinde: kásipkerlikke, densaýlyq saqtaý men bilim berý salasyna qoldaý kórsetý, jumyspen qamtý, turǵyn úı qurylysy, sondaı-aq, oblys jurtshylyǵyn tolǵandyratyn ózge de máselelerdi talqylady.
Keńes barysynda Almaty oblysynyń ákimi A. Batalov, QR eńbek jáne halyqty áleýmettik qorǵaý mınıstri T. Dúısenova, QR densaýlyq saqtaý mınıstri E. Birtanov, QR bilim jáne ǵylym mınıstri E. Saǵadıev, QR ınvestıtsııalar jáne damý mınıstri J. Qasymbek jáne QR aýyl sharýashylyǵy birinshi vıtse-mınıstri Q. Aıtýǵanov sóz sóıledi.
Sondaı-aq, kezdesýde oblystyq Ardagerler keńesiniń tóraǵasy E. Kelemseıit, «Lýkoıl Lýbrıkants Ortalyq Azııa» JShS bas dırektory A. Matıýkov, І. Jansúgirov atyndaǵy JMÝ stýdenti A. Orazaly, «Eskeldi» ÓK basshysy S. Sarıev, Oblystyq qoǵamdyq kelisim keńesiniń tóraǵasy O. Jaqııanov, «Núsipov jáne K» JShS dırektory Q. Núsipov, Іle aýdanynyń M. Maqataev atyndaǵy №13 orta mektebiniń dırektory Ǵ. Nádirbekova, «Ognı Alataý» oblystyq gazetiniń bas redaktory A. Idıgov sóz sóılep, suraqtar qoıdy.
Memleket basshysynyń tapsyrmasyna oraı, QR Úkimeti óndiristi ártaraptandyrý, jańǵyrtý, eksport kólemin ulǵaıtý jáne ınvestıtsııalar tartýdan turatyn ekonomıkalyq ósimniń jańa úlgisine aýysýdyń keshendik jumystaryn júrgizýde. Osynyń bári el ekonomıkasynyń ósimin jyl sońyna qaraı 5-6% deńgeıinde qamtamasyz etýge múmkindik beredi dep josparlanǵan.
QR Úkimeti atalǵan kórsetkishterge qol jetkizý úshin óz jumysyn bes baǵytqa jumyldyrady, olar: jappaı kásipkerlikti damytý, ónimdi jumyspen qamtý men qarjylyq turaqtylyqty qamtamasyz etý, tsıfrlyq ekonomıka men salalyq jobalardy damytý.
QR Úkimeti jumysyndaǵy mańyzdy baǵyttardyń biri qurylys sektoryn damytý. Soǵan oraı Memleket basshysynyń tapsyrmasy boıynsha bıylǵy jyldan bastap «Nurly jer» baǵdarlamasyn júzege asyrý jumystary qolǵa alyndy, onyń aıasynda taıaý 15 jyldyń ishinde 1,5 mln otbasyny turǵyn úımen qamtamasyz etý kózdelgen.
Sondaı-aq, agrarlyq sektordy damytýǵa da erekshe kóńil bólinedi, bul sala QR Prezıdenti N. Nazarbaevtyń tapsyrmasyna sáıkes ekonomıkanyń jańa draıverine aınalýy tıis.
Almaty oblysynyń atalǵan salada kóshbasshy bolýǵa barlyq qajetti áleýeti bar, alaıda nazardy tek aýyl sharýashylyǵy shıkizattaryn óndirýge ǵana emes, sondaı-aq daıyn ónimniń básekege qabiletti bolýyna da aýdarý kerek.
QR Úkimetiniń aldynda taǵy da bir mańyzdy mindet - eńbek naryǵyn jańǵyrtý máselesi tur. Ol óndiristiń barlyq túrine zamanaýı tehnologııalardy engizýge negizdeledi.
Budan ózge, QR Prezıdenti N. Nazarbaevtyń tapsyrmasy boıynsha tegin kásibı-tehnıkalyq bilim berý baǵdarlamasy qabyldandy, ol jańa kásiporyndardy bilikti mamandarmen qamtamasyz etýge múmkindik beredi.
Sonymen qatar, qazirgi tańda Qazaqstanda tsıfrlandyrý men aqparattandyrý qaǵıdalaryna negizdelgen, densaýlyq saqtaý men bilim berýdiń jańa júıelerin qalyptastyrýdyń keshendi jumystary júrgizilýde.
Barlyq alǵa qoıylǵan mindetterdi iske asyrý úshin QR Úkimetiniń, azamattyq qoǵamdastyqtyń uıymdasqan jumysy qajet. Sondaı-aq Almaty oblysy turǵyndarynyń Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýy men «Bolashaqqa baǵdar: qoǵamdyq sanany jańǵyrtý» baǵdarlamalyq maqalasynda alǵa qoıǵan mindetterin iske asyrý máselesinde belsendi bolýy mańyzdy.
Keńes qorytyndysy boıynsha B. Saǵyntaev jaýapty memlekettik organdarǵa jáne oblys ákimdigine kóterilgen barlyq máselelerdiń sheshimin baqylaýǵa alýdy tapsyrdy.
