Saǵyntaev: «Almaty Bıznes 2025» biryńǵaı baǵdarlamasy jasaldy
ALMATY. QazAqparat – Almatyny Orta Azııanyń bıznes-habyna aınaldyrý úshin kásipkerlikti damytýdyń «Almaty Bıznes 2025» biryńǵaı baǵdarlamasy jasaldy, dep habarlaıdy QazAqparat tilshisi.
Almatyda «Atameken» UKP birge Almaty ákimi janyndaǵy Іskerlik keńestiń alǵashqy otyrysy men jyl saıynǵy kásipkerlerdiń V konferentsııasy ótti. Bul týraly Baqytjan Saǵyntaev óziniń instagram-ǵy paraqshasynda jazdy.
«Kásipkerlikke qoldaý kórsetý men damytý — ákimdik jumysynyń strategııalyq basty baǵyttarynyń biri. Almatyny Orta Azııanyń bıznes-habyna aınaldyrý úshin kásipkerlikti damytýdyń «Almaty Bıznes 2025» biryńǵaı baǵdarlamasy jasaldy. Munda negizgi bes baǵyt kórinis tapqan, olar - ákimshilik kedergilerdi azaıtý, bıznesti qarjylandyrýdy ulǵaıtý, óndiris, servıs jáne saýda úshin ınfraqurylymdy damytý, kásipkerlik negizderin oqytý jáne ınvestıtsııalyq jobalardy keshendi júrgizý»,-dep jazdy Baqytjan Saǵyntaev.
Ol sondaı-aq, áleýmettik salaǵa da erekshe nazar aýdarylatynyn aıtty.
«Qyzmet kórsetýge jete nazar aýdarylady. Medıtsına, bilim, ІT tehnologııa jáne týrzım salalarynda bızneske qoldaý kórsetý bular da saraptamaly-baǵdarly klaster qurýǵa múmkindik beredi»,-dedi ákim.
Ákimdik, UKP birge «shıkizat-óndiris-ótkizý» syzbasy boıynsha jobalardy júzege asyrýdyń jańa mejelerin belgileıtin boldy.
«Biz osylaısha qalanyń bıznes-ahýalyn túbegeıli ózgerte alamyz»,-deıdi Almaty qalasynyń ákimi.
