Saǵyntaev Aqtóbedegi jylyjaı keshenimen tanysty
AQTÓBE. QazAqparat - Aqtóbede aýmaǵy 9,5 gektar bolatyn jylyjaı kesheniniń qurylysy aıaqtaldy. Óńirge eki kúndik jumys saparymen kelgen Premer-Mınıstr Baqytjan Saǵyntaev keshendi qarap shyqty, dep habarlaıdy QazAqparat tilshisi.
Aqtóbeniń Keńes Nokın aýyly mańynda jylyjaılar aýmaǵy ornalasqan. Búgin keshke óńirge kelgen Úkimet basshysy Baqytjan Saǵyntaev aýmaǵy 9,5 gektar bolatyn jylyjaıdy aralap kórdi. Joba quny - 4,9 mıllıard teńge. Munda qııar men qyzanaq ósiriledi. "Greenhause Kazakhstan" JShS-niń dırektory Múslim Bekteptiń aıtýynsha, keshen qurylysyna qajetti qarjynyń 3,4 mıllıard teńgesi "QazAgroQarjy" AQ arqyly bólindi.
"Jylyna 5700 tonna ónim shyǵarylady. Gollandııalyq tehnologııa boıynsha salyndy. Munda barlyǵy 60 adam jumysqa ornalasty", - dedi Múslim Bektep.
Aıta keteıik, Baqytjan Saǵyntaev Aqtóbedegi aýyl sharýashylyǵy keshenimen tanysty. Aýyl sharýashylyǵy kooperatıviniń tehnıkasymen tanysyp, oblysta óndiriletin ónimder kórmesin qarap shyqty.
