Saǵyntaev Aqmola oblysynyń ónerkásiptik kásiporyndarynyń tehnologııalyq deńgeıin baǵalady
ASTANA. QazAqparat - Búgin QR Premer-Mınıstri Baqytjan Saǵyntaev Aqmola oblysyna jumys sapary aıasynda iri mashına jasaý kásiporny «Tynys» AQ-na baryp, zaýyttyń QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» Joldaýy aıasynda tehnologııalyq jańǵyrtý jumystaryn júrgizýge arnalǵan áleýetin baǵalady, dep habarlaıdy primeminister.kz .
Baqytjan Saǵyntaev zaýytty aralaý barysynda qubyr daıyndap shyǵaratyn tsehty, óndiristik jelilerdi qarap shyǵyp, óndiris tehnologııasymen, jabdyqtarmen, sondaı-aq osynda shyǵarylatyn ónimderdiń kórmesimen tanysty.
«Tynys» AQ dırektory Qaırat Qalmanbaev QR Premer-Mınıstrine zaýyttyń qyzmeti men tehnologııalyq jańǵyrtý jumystaryn júrgizý keleshegi týraly aqparat berdi. Onyń aıtýynsha, kásiporynnyń tehnıkalyq múmkindikteri jáne jumysshylardyń áleýeti jańa baǵyttardy ıgerýge jáne naryqtyń suranystaryna shuǵyl áreket etýge múmkindik beredi. Zaýyt óndiristik qýattylyǵyn ulǵaıtý men shyǵaratyn ónimderiniń túrlerin kóbeıtýdi jalǵastyrýda.
Eske sala keteıik, ónerkásiptik kásiporyndardy tehnologııalyq jańǵyrtý QR Prezıdentiniń «Qazaqstannyń úshinshi jańǵyrýy: jahandyq básekege qabilettilik» Joldaýynda elimizde ekonomıkalyq ósimniń jańa modelin qalyptastyrýdyń negizgi baǵyttarynyń biri retinde kórsetilgen. Jańǵyrtý jumystary ónimdilikti ulǵaıtýǵa jáne shyǵarylatyn ónimderdiń sapasyn arttyrýǵa baǵyttalǵan.
«Tynys» AQ avıatsııa ónimderin, órt sóndirý quraldaryn, gazilmekti armatýra, medtehnıkalar, polıetılendi qubyrlar, salmaq ólsheýshi tehnıkalar jáne t. b. shyǵarady. Zaýyttyń jónge keltirilgen ótkizý naryǵy bar, olardyń qatarynda Reseı Federatsııasy, Ózbekstan jáne Ýkraına bar.
«Tynys» AQ aralaý aıasynda qonaqtarǵa júk avtokóligi jáne shynjyr tabandy tehnıkalardy kúrdeli jóndeý qyzmetterin usynatyn Qazaqstannyń iri kásiporny «QI - 811 Avtojóndeý zaýyty» AQ shyǵarǵan arnaıy áskerı tehnıka kórmesi usynyldy.
