Saǵyntaev Aqmola oblysynyń kásipkerlerin tolǵandyrǵan máselelerdi talqylady
ASTANA. QazAqparat - Búgin Aqmola oblysyna jumys sapary aıasynda QR Premer-Mınıstri Baqytjan Saǵyntaev aımaqtaǵy Kásipkerler palatasynyń Óńirlik keńesiniń múshelerimen kezdesip, shaǵyn jáne orta bıznesti qoldaý men damytý máselelerin talqylady, dep habarlaıdy primeminister.kz.
Kezdesý barysynda qatysýshylar týrıstik salany damytýǵa bólingen qosymsha qarajattyń bólinýin, saýda naryqtaryn jańǵyrtýdy, «BJK-2020» baǵdarlamasy aıasynda paıyzdyq mólsherlemeni sýbsıdııalaýǵa bıýdjetti arttyrýdy, iri aýyl sharýashylyǵy óndirýshileri kooperatıvterin qarjylandyrýdy, eldi mekenderdiń bas josparyn túzetýdi, sonymen qatar Qazaqstanda shaǵyn ındýstrııalyq aımaqtardy damytý máselelerin talqylady.
Keńeste Óńirlik keńes tóraǵasy, «Esil» JShS bas dırektory Qazbek Eskendirov, «Eńbek» JShS basshysy Qýanysh Raqyshev, «Torgovyı dom» JShS bas dırektory Alekseı Smagın, «Novyı Kokshetaý» JShS basshysy Rýstam Djangýnakov, «Gormolzavod» JShSdırektory Ásen Jaqsylyqov, A. Myrzahmetov atyndaǵy Kókshetaý ýnıversıtetiniń prezıdenti Mádı Elýbaev, sonymen qatar «Trend+» JShS quryltaıshysy Erjan Qýanǵan jáne «Zeren-Nur» demalys ortalyǵynyń dırektory, Aqmola oblysynyń týrıstik bıznes qaýymdastyǵynyń tóraǵasy Qaırat Sultanov sóz sóıledi.
Kóterilgen taqyryptarǵa oraı QR Ulttyq ekonomıka mınıstri Tımýr Súleımenov, QR Aqparat jáne kommýnıkatsııalar vıtse-mınıstri Qaırat Balyqbaev túsinik berdi.
Sóz barysynda Baqytjan Saǵyntaev kásipkerlikti damytý Úkimet jumysynyń basty basymdyqtarynyń biri ekendigin atap ótti. Bul baǵytta bıznes úshin qolaıly jaǵdaılar týdyrý boıynsha tıisti sharalar júzege asyrylyp jatyr, onyń ishinde bıznes shyǵyndaryn azaıtý, tekserýlerdi qysqartý, nesıelik qoldaýdy qaıta retteý men keńeıtý sııaqty jumystar da bar. Sonymen qatar, qazirgi kezde jańa eki memlekettik baǵdarlama iske asyrylýda: AÓK damytý men ónimdi jumyspen qamtý jáne jappaı kásipkerlik, bul baǵdarlamalarda da bıznesti qabyldaý tásilderi qarastyrylǵan.
