Saǵyntaev ákimderge: Qymbat kólik emes, órtke qarsy tehnıkalar alý qajet
ASTANA. QazAqparat - Búgin Úkimettiń selektorlyq rejımdegi otyrysynda QR Premer-Mınıstri Baqytjan Saǵyntaev barlyq ákimderge eń aldymen qymbat kólik emes, órtke qarsy tehnıka satyp alý qajettigin eskertti, dep habarlaıdy QazAqparat tilshisi.
«Aǵymdaǵy jyly Qazgıdromettiń málimetterine sáıkes, respýblıkanyń birqatar óńirinde jaz kezinde aýa temperatýrasy normadan joǵary bolatyndyǵy kútilýde. Sol sebepti bul máselege erekshe kóńil bólý qajet. Aýyl sharýashylyǵy, Investıtsııalar jáne damý mınıstrlikterine, oblystardyń, Astana men Almaty qalalarynyń ákimdikterine birlesip tabıǵat qorǵaý jáne orman mekemelerin órt sóndirý tehnıkalarymen jaraqtandyrylý deńgeıin arttyrý boıynsha sharalar qabyldaýdy tapsyramyn», - dedi Úkimet basshysy.
Onyń aıtýynsha, bul baǵytta oblystarda jumystar júrgizilip jatyr. Degenmen, qajetti deńgeıde materıaldyq-tehnıkalyq qamtamasyz etý tómen.
«Biz endi baspasóz betterinen oqyp, kórip otyrmyz. Ákimshilikter qymbat avtokólikterdi jylda satyp alynady. Al myna orman, dala órtterin sóndirýge baılanysty ne bolmasa tasqyn sýǵa qorǵanys jasaýǵa qajetti qural-jabdyqqa kelgende aqsha joq bolyp qalady. Sol sebepten óńirlerdegi qurmetti áriptester, osy máselege basa nazar aýdaryńyzdar. Alǵashqy kezeńde qajeti materıaldyq-tehnıkalyq qamtamasyz etý máselesine kóńil bólýdi suraımyn. Sodan soń qalyp jatsa basqasyn da ala jatarsyzdar. Ómirzaq Estaıuly (Aýyl sharýashylyǵy mınıstri Shókeev - avt.) saraptama jasaý kerek. Baqyt Turlyhanuly (Qarjy mınıstri Sultanov- avt.) sony baqylaýǵa alý qajet», - dedi Premer-Mınıstr.
Sonymen qatar, ol ákimdikter men Іshki ister mınıstrligi balalardy saýyqtyrý lagerleriniń, sanatorıılar men demalys aımaqtarynyń órt qaýipsizdigine erekshe nazar aýdarýy qajettigin basa aıtty.
«Jaqynda maýsym bastalady. Soǵan daıyndyǵymyz joǵary dárejede bolýy tıis. Іshki ister mınıstrligi múddeli memlekettik organdarmen jáne jergilikti atqarýshy organdarmen birlesip, orman-dala órtterin aldyn alý jáne olardy joıý jónindegi vedomstvoaralyq is-sharalar josparyn sapaly iske asyrylýyn qamtamasyz etýi qajet»,- dedi Baqytjan Saǵyntaev.
