Saǵyndyq Toǵambaı «Elorda kýbogy» týrnıriniń jeńimpazy atandy

ASTANA. KAZINFORM – 92 keli salmaq dárejesinde fınaldyq kezeńge shyqqan Saǵyndyq Toǵambaı sheshýshi aıqasta qytaılyq boksshy Han Sıýechjenmen qolǵap túıistirdi. 

Úsh raýnd qorytyndysy boıynsha tóreshilerdiń sheshimimen qazaqstandyq boksshy jeńiske jetti. Osylaısha Saǵyndyq elordadaǵy týrnırdiń altyn júldesin qanjyǵasyna baılady. 

2022 jyly Qytaıdyń Hanchjoý qalasynda ótken Azııa chempıonatynyń jartylaı fınalynda Saǵyndyq Toǵambaı Sıýechjenge ese jiberip, qola júldeger atanǵan edi. Araǵy eki jyl salyp otandasymyz qytaılyq boksshydan ese qaıyrdy. 

Eske salsaq, buǵan deıin halyqaralyq Elorda Cup týrnırinde fınaldyq jekpe-jekter ótetinin habarlaǵan bolatynbyz.