Saǵyndyq Toǵambaı bokstan álem chempıonaty jartylaı fınalynan tys qaldy

ASTANA. KAZINFORM - Anglııanyń Lıverpýl qalasynda World Boxing aıasynda ótip jatqan álem chempıonatyn Qazaqstan quramasynan Saǵyndyq Toǵambaı (90 keli) shırek fınalda aıaqtady.

Otandasymyz shırek fınalda ózbekstandyq Týrabek Habıbýlaevpen qolǵap túıistirdi.

Birinshi jáne ekinshi raýndta tóreshiler biraýyzdan ózbekstandyq boksshynyń jeńgenin kórsetti. Nátıjesinde Týrabek Habıbýlaev jarysty jalǵastyrýǵa múmkindik aldy.

Qarsylas ta ońaı bolǵan joq. 2004 jyly dúnıege kelgen ózbekstandyq boksshy 2024 jyly Azııa chempıony atansa, 2022 jyly jastar arasynda álem chempıony ataǵyn jeńip alǵan edi.

Saǵyndyq Toǵambaı 2001 jyly 15 aqpanda Astana qalasynda dúnıege kelgen. 2024 jyly Azııa chempıony atansa, 2022 jyly Jazǵy Azııa oıyndarynda qola júldeger boldy.

Búgin el quramasynan Mahmýd Sabyrhan (55 keli), Tórehan Sabyrhan (70 keli), Vıktorııa Grafeeva (60 keli), Eldana Talıpova (80 keliden joǵary) jartylaı fınalǵa shyqsa, Nurbek Oralbaı (80 keli) jarys jolyn aıaqtady.

Endi Qazaqstan ýaqytymen 22:00-de bastalatyn keshki sessııada Alýa Balqybekova (51 keli), Karına Ibragımova (57 keli), Aıda Ábikeeva (65 keli), Gúlsaıa Erjan (80 keli), Bıbarys Jeksen (65 keli), Aıbek Oralbaı (90 keliden joǵary) sharshy alańǵa shyǵady.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótedi. Jekpe-jekter «Qazaqstan» jáne «Qazsport» telearnalarynan tikeleı efırde kórsetiledi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.

World Boxing uıymynyń aıasynda alǵash ret ótetin álem chempıonatyna 68 elden barlyǵy 554 (erler - 329, áıelder - 225) keldi.

Eske salsaq, budan buryn Álem chempıonatynda Tórehan Sabyrhan frantsııalyq Makan Traoreden basym tústi.