Saǵyndyq Toǵambaı Azııa chempıonatyna daıyndyǵy týraly aıtty
ASTANA. KAZINFORM — Bokstan Qazaqstan erler quramasynyń múshesi Saǵyndyq Toǵambaı (90 keli) World Boxing aıasyndaǵy 2026 jylǵy Azııa chempıonatyna daıyndyq jáne aldaǵy qarsylastary jóninde pikirin bildirdi.
Bul jóninde ol Qazaqstan boks federatsııasyna bergen suhbatynda áńgimelep berdi.
— Qurlyqtyq dodadaǵy qarsylastarym osal emes. Solardyń biri — qytaılyq boksshymen alǵash ret Azııa oıyndarynda kezdesken edim. Ol joly qarsylasyma ese jiberdim. Odan keıin Astanadaǵy Elorda kýbogynda esemdi qaıtardym. Bul joly úshinshi márte sheberlik baıqasamyz. Aldaǵy jekpe-jekte jeńispen qýantamyn degen oıdamyn. Jalpy, bul salmaqta álem boıynsha myqty boksshylar kóp. Máselen, ózbekstandyq qarsylastarymdy erekshelep aıtar edim. Sondaı-aq qurlyqtyq dodada Tájikstan, Úndistan boksshylary da júldege iligýdi qalaıdy. Men 2019 jyly Mońǵolııada jastar arasynda Azııa chempıonatyna qatysqan edik. Qazir olardyń arasynan Mahmud Sabyrhan, Erasyl Jakpekovti jankúıerler jaqsy tanıdy. Barlyǵymyz endi Azııa chempıonatyna qatysýǵa múmkindik aldyq, — dedi Saǵyndyq Toǵambaı.
Saǵyndyq Toǵambaı 2001 jyly 15 aqpanda dúnıege kelgen. Qazirge deıin 2024 jyly altyn alsa, 2022 jyly qola júldeger atandy.
Bıyl qurlyqtyq dodada Saǵyndyqtan ózge erler quramasy sapynda Sanjar Táshkenbaı (50 keli), Mahmud Sabyrhan (55 keli), Orazbek Asylqulov (60 keli), Ertýǵan Zeınýlınov (65 keli), Tórehan Sabyrhan (70 keli), Sabyrjan Aqqalyqov (75 keli), Erasyl Jaqpekov (80 keli), Nurbek Oralbaı (85 keli) jáne Aıbek Oralbaı (90 keliden joǵary) synǵa túsedi.
Aıta ketsek, Azııa chempıonatynda 31 naýryzda Rımma Volosenko (60 keli) jarys jolynan shyǵyp qaldy.
