Saǵyn Ómirbaıuly «Slavıan bazarynyń» balalar baıqaýynda ekinshi oryn aldy
ASTANA. KAZINFORM — Ótken beısenbide Belarýs elinde «Vıtebsktegi slavıan bazary» HHHІІІ halyqaralyq óner festıvaliniń ashylýy ótti.
Festıvaldi ashqan Belarýs Prezıdenti Aleksandr Lýkashenko «Slavıan bazary» Reseıden Úndistanǵa, Qytaıdan Kolýmbııaǵa deıin 40-tan astam eldiń oı-maqsaty ortaq ónerli azamattarynyń basyn qosqanyn atap ótti.
«Búginde bul festıval ártúrli ulttyń, dinder men mádenıet ókilderiniń — avangardtan klassıkaǵa deıingi talǵamy keń ónerdiń shynaıy bilgirleriniń basyn biriktiredi. Biraq, eń bastysy, bul — naǵyz otbasylyq merekege, dástúrli qundylyqtar merekesine aınalyp otyr», — dedi Belarýs basshysy.
Ashylý saltanatynda HHІІ Halyqaralyq «Vıtebsk» balalar mýzykalyq baıqaýynyń jeńimpazy anyqtalyp, 139 upaı jınaǵan ózbekstandyq ıAsmına Hýsnıddınova top jardy.
Qazaqstan ókili Saǵyn Ómirbaıuly jeńimpazdan bir upaı kem alyp, ekinshi oryndy ıelendi. Ol qazaqtyń halyq áni «Eki jırendi» oryndady.
Án baıqaýyna 10-nan astam elden barlyǵy 14 bala qatysqanyn atap ótken jón.
Ashylý kúni festıval sahnasynda Belarýs, Reseı jáne Ispanııanyń tanymal ártisteri ónerin pash etti. Kontsertte Slavıan bazary tarıhynda alǵash ret Ońtústik Afrıka Respýblıkasynyń ókilderi tóbe kórsetti.
Festıval aıasyndaǵy alǵashqy sharalar 5 shildede bastaldy. Osy ýaqyt ishinde Vıtebskide birqatar aýqymdy is-shara ótedi: kórmeler, qoıylymdar, tanymal oryndaýshylardyń jeke kontsertteri, marsh sherýleri jáne t. b.
12 shilde, juma kúni Shanhaı yntymaqtastyq uıymyna múshe elderdiń ulttyq mádenıetter kúni bolyp jarııalandy.
Bul kúni ShYU-ǵa múshe memleketter ókilderiniń qatysýymen «Mádenıetter dıalogy — ShYU elderi halyqtarynyń birliginiń faktory» taqyrybynda dóńgelek ústel ótedi.
Senbi kúni Vıtebsk jazǵy amfıteatrynyń sahnasynda 15 elden kelgen talanttar arasynda Almaty qalasy ákiminiń estradalyq-sımfonııalyq orkestriniń ánshisi, «Vıtebsk-2024» XXXIII halyqaralyq estradalyq án oryndaýshylar baıqaýy ótedi.
«Jas qanat» baıqaýynyń Gran-prı ıegeri Ernazar Juban óner kórsetedi.
Jeksenbi, 14 shildede mádenı forým kelesi jylǵa deıin jumysyn aıaqtaıdy.
