Saǵatyna 260 km jyldamdyqpen qashqan: Polıtseıler kólik urysyn jarty saǵat qýǵan
TALDYQORǴAN. QazAqparat - Almaty oblysynda ózgeniń kóligin urlaǵan kúdikti polıtseılerden qashyp, túrli aıla jasaǵan, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 13 qyrkúıekte saǵat túngi 01:00 shamasynda Qarasaı aýdany polıtsııasynyń kezekshi bólimine 27 jastaǵy er adam telefon shalyp, Qaınar aýylynda belgisiz bireý «Toyota Camry» markaly kóligin urlap ketkeni týraly aryzdanǵan. Kólik quralyn zańsyz ıelený faktisi boıynsha ákimshilik óndiris qozǵaldy (QR QK 200-baby 1-bóligi).
Habarlamany alǵan «№ 190 bort» ekıpajy – patrýldik qyzmet rotasynyń ınspektorlary polıtsııa leıtenanty Esbol Nııazbaev pen polıtsııa leıtenanty Ádilet Baıqadyrov «Ustaý» jospary boıynsha «Almaty-Bishkek» avtojolyna attanǵan. Olar ratsııa arqyly qoldy bolǵan kóliktiń qashyp kele jatqanyn bilip, onyń qozǵalys baǵytynda jasandy jol keptelisin jasaǵan.
Urlanǵan avtokólik óte joǵary jyldamdyqpen qozǵalyp, polıtseılerdiń toqtaý týraly talabyn elemesten, kúdikti kólikti birden leıtenant E.Nııazbaevqa qaraı baǵyttaǵan. Ol óziniń eptiligi men shapshańdyǵynyń arqasynda jol shetine sekirip, kólik soqqysynan qashyp úlgergen. Kúdikti qýǵynshylardan qara úzip ketýi úshin túrli manevrler jasaǵan: jol shetindegi bordıýrlerden sekirip, joldyń qarsy baǵytyna shyqqan, jasandy kedergilerden aınalyp ótý úshin jolsyz dalamen júrgen. Onyń kóligi keı sátte saǵatyna 260 km astam jyldamdyqpen qozǵalǵan.
36 mınýttyq ekstremaldy júristen keıin № 199 ekıpajdyń janar-jaǵar maıy taýsylýǵa jaqyndaǵan. Qylmyskerdiń izine túsken ózge kólikterdiń alysta qalǵanyn eskere otyryp, erjúrek polıtseıler qylmyskerdi jiberip almaý úshin kúdiktiniń kóligin qaǵyp toqtatýǵa sheshim qabyldaıdy. Júrgizýshi leıtenant A.Baıqadyrov joldy jaqsy biletinin paıdalanyp, KamAZ-dy basyp ozǵannan keıin, kúdikti mingen kólikti betondy qorshaýǵa qaraı yǵystyrǵan. Sonda da boı bermegen júrgizýshi qashýǵa tyrysyp, gazdy basqan. Biraq qysylǵan kólik dóńgelegi bir ornynda aınalyp qala bergen.
Onyń jolynda turǵan leıtenant E.Nııazbaev tabeldik qarýynan aspanǵa úsh ret eskertý oǵyn atqan. Biraq qylmysker polıtseılerdiń talaptaryn elemeı, esikterdi jaýyp, iz jasyrýǵa áreket etken. E. Nııazbaev júrgizýshi jaǵynan áınekti aıaǵymen syndyrǵan. Tártip saqshylary qarsylyq kórsetken ony tereze arqyly dalaǵa shyǵarǵan. Jerge jatqyzyp, qoldaryna kisen saldy.
Ustalǵan azamattyń ishimdikke masań kúıdegi Jambyl aýdany Uzynaǵash aýylynyń 28 jastaǵy turǵyny ekeni jáne buǵan deıin birneshe ret sottalǵany belgili boldy. Ol kisi óltirý, zorlaý, tonaý, alaıaqtyq jáne urlyq jasaǵany úshin qylmystyq jaýapkershilikke tartylǵany anyqtaldy. Kúdiktiniń qasynda urlanǵan kólikte Almaty qalasynyń 30 jastaǵy turǵyny bolǵan, ol rýlde otyrǵan adamnyń qurbysy ekenin aıtqan. Ol urlyq týraly bilmegen jáne kólikti toqtatýdy ótingenimen, ony tyńdamaǵan. Kúdikti ýaqytsha ustaý ızolıatoryna qamaldy. Ol urlyq, belsendi qarsylyq jáne polıtsııa qyzmetkerleriniń ómirine qastandyq jasaý derekteri boıynsha zań aldynda jaýap beretin bolady.
