Saǵatyna 1200 km jyldamdyqpen júretin poıyz synaqtan ótkeli jatyr
ASTANA. QazAqparat - Kanadanyń TransPod kompanııasy bolashaqtyń Hyperloop tehnologııasynyń synaq trekin ornatý úshin Frantsııadaǵy shaǵyn eldi mekenderdiń birin tańdady. Qondyrǵyny ornatýdyń quny 21 mln eýrony quraýy múmkin, ol keler jyly bastalýy tıis, dep habarlaıdy euronews.com.
Qazirgi rekord Frantsııanyń TGV poıyzyna tıesili (574,8 km/saǵ). Bul rekord Lımojdan 50 shaqyrym jerde ornalasqan Drý shaǵyn eldi mekeninde jańartylýy múmkin. 2015 jyly qurylǵan TransPod Frantsııa bıligine ótinish berip, synaq alańyn salýǵa ruqsat almaq.
«Lıtsenzııa qarashada maquldanýy tıis. Al montajdaý jumystary 2019 jylǵy qańtarda bastalady», - deıdi TransPod kompanııasynyń bas dırektory Sebastıan Gendron.
Amerıkalyq belgili kásipker Ilon Mask qoldap otyrǵan Hyperloop tehnologııasy jolaýshy nemese júk tasymaldaýǵa arnalǵan, saǵatyna 1200 km jyldamdyqpen júretin alyp kapsýlalardy jasaýǵa mamandanǵan.
