Saǵattap kútýge májbúr: Óskemendegi Ahmer kentiniń halqy avtobýstyń durys júrmeıtinine narazy
ÓSKEMEN. KAZINFORM — Ahmer kenti Óskemen qalasynyń irgesinde oryn tepken. Sondaǵy jurtshylyq kentten qala ishine qatynaıtyn avtobýstyń tym azdyǵyn aıtyp, shaǵymdandy.
Tańsáriden turýǵa májbúr
Búgingi tańda Ahmer kentinde 7 myńǵa jýyq adam turady. Olardyń arasynda qalaǵa baryp jumys isteıtinder, bilim alatyn stýdentter men oqýshylar az emes. Kúnde tańerteń kent ishindegi aıaldamalarda avtobýs kútip turǵan halyq qarasy qalyń.
— Ózim qalaǵa barý úshin № 55 avtobýsqa otyramyn. Óte sırek júredi. Jarty saǵat, keıde tipti saǵattap kútemiz. Al kelgen avtobýstyń ishinde adam degen aýzy-murnynan shyǵyp jatady. Ine shanshar oryn joq. Ter ıisi kıimge de sińip ketedi, — deıdi ahmerlikterdiń biri.
Halyq № 55 qana emes, № 42 avtobýstyń da durys júrmeıtindigin jetkizdi.
Qalalyq bilim bóliminiń málimetine súıensek, Ahmer halqynyń ishinde oqýshylar sany 30%-ǵa jýyq. Al olardyń barlyǵy osy kentte oqymaıdy. Qalaǵa baratyndar mektepke úlgerý úshin tańsáriden turýǵa májbúr.
Ákimdik ne deıdi?
Óskemen qalasynyń TÚKSh, jolaýshy kóligi jáne avtomobıl joldary bóliminiń habarlaýynsha, Ahmer kentine kelesi avtobýs marshrýttary qatynaıdy:
— № 42, sońǵy aıaldamalary — «Óskemen vokzaly-Jańa Ahmer» (Barlyǵy 9 avtobýs bar);
— № 55, «Ivýshka» saýda úıi-Jańa Ahmer» (7 avtobýs);
— № 255, «19-shaǵyn aýdan-Jańa Ahmer» (3 shaǵyn avtobýs);
— № 256, «Ózen vokzaly-28-shaǵyn aýdan» (2 shaǵyn avtobýs);
— № 71, «Ózen vokzaly-Gerasımovka aýyly» (2 avtobýs).
— Osy baǵyttaǵy eń joǵary ýaqyttaǵy jelilik qozǵalys aralyǵy 5-10 mınýt. Atalǵan baǵyttarǵa tasymaldaýshylar avtobýstardy tolyq kólemde shyǵarady. Alaıda qoǵamdyq kólikterdiń synýy nemese júrgizýshilerdiń aýyryp qalýy syndy birqatar sebepke baılanysty osyndaı másele baıqalyp otyr. Bul negizinen № 55 avtobýsqa qatysty. Tasymaldaýshylarǵa jelilik qozǵalys aralyǵyn tıisti deńgeıde saqtaý jáne barlyq josparlanǵan reısdiń oryndalýyn qamtamasyz etý qajettiligi týraly nusqaýlar berildi, — deıdi bólim basshysynyń orynbasary Marat Tuńǵyshbaev.
Onyń aıtýynsha, naqty ýaqyt rejıminde qalalyq marshrýttardyń barlyq avtobýsynyń qozǵalysyn «ONAY!» baǵdarlamasynan kórip otyrýǵa bolady.
— Jaz mezgilinde jolaýshylar aǵynynyń kúrt tómendeýi baıqalǵan. Sondyqtan, oqý jylynyń bastalýyna oraı osy avtobýs marshrýttaryndaǵy jolaýshylar aǵyny qosymsha zerdelenedi. Qajet bolǵan jaǵdaıda kesteler sany ulǵaıtylady. Ákimdik tarapynan qoǵamdyq kóliktiń jumysyna baılanysty másele nazarda. Ár avtobýs boıynsha sheshim tasymaldaýshylarmen birlesip jeke tártippen qabyldanady, — deıdi Marat Tuńǵyshbaev.
Eske salsaq, osyǵan deıin Óskemende oqýshylar avtobýspen tegin qatynaıtyndyǵyn jazǵan edik.