Saǵat tiliniń shegerilýi: Namaz ýaqyty qalaı ózgeredi
ASTANA. KAZINFORM - 1 naýryzǵa qaraǵan túni 3 megapolıs pen 11 oblysta ýaqyt bir saǵat artqa shegerilýine baılanysty namaz ýaqyttary da ózgerip otyr. Qazaqstan musylmandary dinı basqarmasynyń baspasóz qyzmeti osyǵan baılanysty habarlama taratty.
"Ózderińizge belgili, 2024 jyldyń 29 aqpanynan 1 naýryzǵa qaraǵan túni saǵat 00:00-de Astana, Almaty, Shymkent, Abaı, Aqmola, Jambyl, Jetisý, Qaraǵandy, Qostanaı, Pavlodar, Soltústik Qazaqstan, Túrkistan, Ulytaý jáne Shyǵys Qazaqstan oblystary jergilikti ýaqytty 1 saǵatqa artqa jyljytady. Osylaısha, elimizdiń barlyq aımaǵy 5-shi saǵattyq beldeýde ornalasady.
Osylaısha Qazaqstan boıynsha UTC (Dúnıejúzilik úılestirilgen ýaqyt) +5 ýaqytyna aýysqan sátte namaz ýaqyttary da avtomatty túrde ózgeredi. Qazaqstan musylmandary dinı basqarmasynyń resmı www.muftyat.kz saıtyndaǵy namaz kestesinen ózderińizge qajetti aýyl men qaladaǵy namaz ýaqyttary jaıly málimetterdi alýǵa bolady. Al juma namazyna qatysty málimet tómendegi kestede kórsetildi" delingen habarlamada.
