«Saǵat saıynǵy altyn syńǵyry» - respýblıkalyq basylymdarǵa sholý

«Egemen Qazaqstan» gazetiniń búgingi sanynda «Bas shyrsha shamdary jarqyraı jandy» degen maqala jarııalandy. Keshe keshqurym Qazaqstan Prezıdenti Nursultan Nazarbaev saltanatty jaǵdaıda eldiń jańajyldyq bas shyrshasynyń shamdaryn jaqty. Basylymnyń jazýynsha, Memleket basshysy ótip bara jatqan 2010 jyl qazaqstandyqtar úshin turaqtylyq pen senimge toly jyl bolǵanyn atap kórsetti. Elimiz jańa tabys­tar men jetistikterge qol jetkizdi. Qazaq­stan óz damý boljamynan kóshilgeri keledi. El ekonomıkasy joǵary qarqynmen da­mýda. Elimiz boıynsha jańa kásiporyndar men ınnovatsııalyq óndirister ashylýda. Bul jumystar halyqtyń áleýmettik jaǵ­daıyn birneshe ese ósiretin bolady. Onyń barlyǵy sizderdiń ata-analaryńyzdyń jaǵdaıyn túzep, balalaryn oqytýǵa, sportqa baýlýǵa, basqa da ıgi isterge septigin tıgizedi. Keleshek ıeleri, sizder úshin biz eldiń táýelsizdigin ornatyp, memleketti quryp jatyrmyz, bola­shaqtaryń baıandy bolsyn, jastaryń uzaq, ata-analaryń aman bolsyn, eldiń úlken azamaty bolyp, Otandaryńdy súıip ótińder, degen atalyq meıirmen balalarǵa qaraǵan Elbasy barsha qazaqstandyqtarǵa jańa tabystar, zor densaýlyq, yrys pen baıandy baqyt tiledi.

«Keshe Qazaqstan qorjyny taǵy segiz altyn júldemen tolyqty. Tańerteńnen keshke deıin qymbat júldeni alý ońaı emes, árıne. Azıada bastalysymen bir kúnde osynshama altyn medaldy sanaı almaı júrgen bizge karate-dodan 60 kılo salmaqta synǵa túsken Darhan Assadilov pen 67 kılo salmaqtaǵy Rınat Saǵyndyqovtyń, onyń aldynda 400 metrge júgirýde Olga Tereshkovanyń, úsh qaǵyp sekirýde Olga Rypakovanyń, onsaıysshy Dmıtrıı Karpovtyń, kórkem gımnastıkadan Qazaqstannyń áıelder quramasy men boksshy Serik Sápıevtiń, jeńil atletıkada 800 metrge júgirýde márege birinshi jetip, altyn júldeni moınyna taqqan Margarıta Matskonyń bul erlikteri rasymen de elimizdiń mereıin bir ósirip tastaǵanyn sózsiz»,-delingen «Egemen Qazaqstan» basylymynda. Qytaıdyń Gýandjok qalasynda ótip jatqan 16-ynshy jazǵy Azııa oıyndarynla otandastarymyzdyń qol jetkizgen jetistigi jaıynda tolyq bilgińiz kelse, gazettegi «Saǵat saıynǵy altyn syńǵyry» atty maqalany oqyńyz.

***
«Qazaqstan EQYU-nyń araǵa on bir jyl salyp, Astanada ótkeli otyrǵan uly quryltaıyn tarıhta qaldyrý máselesine úlken mańyz berýde, basa nazar aýdarýda. Aqparat ólkesi kósilgen keń óriske uqsaıdy. Al Astana sammıtine saýyn aıtylýy osy ólkeni dúr silkindirip, dúbirge bólegen. Búginde jahandaǵy jańalyqqa qushtar, eleń etkizer jaıtqa yntyq, shyndyqtyń shyń-quzyna qııalaı órleýge qumbyl jýrnalıster qaýymy «attaryna» qonyp, qazaq elordasyna attanýda. Resmı Astana olardy qushaq jaıa, qonaqjaılylyqpen qarsy alýǵa ázir eken. Tarıhı oqıǵany kórkemdikke bólep, sózben terbep, jer-jahanǵa jar sala taratar jandarǵa arnalyp, keshe bas qalamyzdaǵy «Shabyt» óner ýnıversıtetiniń ǵajaıyp ǵımaratynda Baspasóz ortalyǵy ashyldy»- dep jazady «Aıqyn» gazeti búgingi sanynda jaryq kórgen «BAQ-qa arnalǵan Baspasóz ortalyǵy ashyldy. Ony Elbasynyń ózi aralap kórdi» degen taqyryppen jarııalanǵan maqalasynda. Basylymnyń atap ótýinshe, Astana sammıtin qalyń jurtshylyqqa taratar jýrnalısterge qandaı jaǵdaı jasalǵanyn Elbasynyń ózi kelip, baqylap qaıtty. Qazaq Ulttyq óner ýnıversıtetiniń sol jaǵalaýdaǵy kók tústi ǵalamat ǵımaratynda oryn tepken sammıttiń Baspasóz ortalyǵynda jýrnalısterdiń jumysy úshin barlyq qajetti jaǵdaı jasalǵan.

«Aıqyn» gazetiniń búgingi nómirinde QR-nyń Frantsııadaǵy Tótenshe jáne Ókiletti Elshisi Nurlan Dánenovpen aradaǵy suhbat «Frantsııa EQYU sammıtine qoldaý kórsetedi» degen taqyryppen berilgen. Basylym tilshisiniń saýaldaryna egjeı-tegjeıli jaýap bergen ol: « Búgin biz Frantsııamen jańa, sapaly deńgeıdegi yntymaqtastyqtyń prıntsıpıaldy qatysýshysy jáne kýágeri bolyp otyrmyz. Bul rette N.Nazarbaev pen N.Sarkozıdiń arasyndaǵy jeke bas faktory, dostyq jáne senim negizindegi ózara qatynasy eki el strategııalyq áriptestiginiń damýynda aıqyndaýshy mán-maǵyna oınaıdy. Osy mán-jaıdyń arqasynda baryp Frantsııa Qazaqstannyń tıisti Kelisim-shartqa qol qoıǵan Batys Eýropadaǵy birinshi eli boldy. Tek Halyqaralyq arenada tájirıbeli, nátıjeli jáne bedeldi saıasatker Prezıdent N.Nazarbaevpen Frantsııa basshysy álemdik saıasat jáne qaýipsizdiktiń kókeıkesti problemalary boıynsha turaqty túrde dıalog júrgizýge múddeli», - deıdi. Ekeýara áńgimeniń tolyq nusqasyn oqyǵyńyz kelse, basylymnyń juma kúni shyqqan sanyn nazaryńyzdan jiberip almańyz.

«Alash aınasy» gazetiniń jazýynsha, ótken ǵasyrdyń 70-jyldary Qaraǵandy oblysynyń Nura aýdanyna qarasty «Nura» asyltuqymdy qoı sharýashylyǵy Qazaqstan kóleminde kilem, trıkotaj fabrıkalarynyń birqataryn júnmen qamtamasyz etýge tikeleı atsalysatyn. Sol tusta respýblıkadaǵy asyltuqymda qoı sharýashylyqtarynda óndiriletin joǵary sortty jún-túbit ónimderi el ishinde ǵana emes, KSRO kóleminde keńinen tanymal, suranysqa ıe edi. Avtordyń aıtýyna qaraǵanda, arada nebári 30-40 jyl ótkenimen, Qazaqstanda jún-túbit óndirisi turalap qaldy, sharýalar jylyna eki márte qyrqylatyn qoı júnin órteýmen, jerge kómip tastaýmen aınalysatyndy shyǵardy. Sebep bireý-aq - júnge suranys joq. Bul maqala gazettiń búgnigi nómirinde «Jylyna 40 myń tonna jún órtep jatyrmyz», degen taqyryppen jaryq kórdi.

Sondaı-aq «Alash aınasy» gazetiniń búgingi sanyndaǵy «Mustafa Óstúrikti óz deńgeıinde nasıhattaı almaı júrmiz» degen taqyryppen maqala berildi. «Shyny kerek, bul suraqqa taekvondonyń tóńireginde júrgen mamandar ǵana bolmasa, qarapaıym halyq jaýap bere almaıdy-aý. Óıtkeni, jasyratyny joq, qazaq sportynda óshpes izin qaldyrǵan nar tulǵamyzdy búginde óz deńgeıinde nasıhattaı almaı júrmiz. Osy olqylyqtyń ornyn sál de bolsa toltyrý maqsatynda Mustafa Óztúriktiń ómirinen azǵana úzindi jarııalaǵandy jón kórip otyrmyz», delingen maqalady.

***

«Kazahstanskaıa pravda» basylymynyń búgingi nómirinde «Shanhaıskaıa sıla edınenııa» degen taqyryppen maqala basyldy. Aıta keteıik, Tájikstan astanasy Dýshanbede ShYU Úkimet basshylary keńesiniń kezekti otyrysy ótti. Basylymnyń jazýynsha, óńirde qaýipsizdik pen turaqtylyqty qoldaý, álemdik qarjy daǵdarysynyń saldaryn eńserýde tıimdi sharalardy izdenip, engizý, sondaı-aq ekonomıkalyq yntymaqtastyq kórsetkishterin arttyrý jumystary búginge Shanhaı yntymaqtastyq uıymynyń basty ustanymy bolyp tabylady. Basylym buǵan dálel retinde Tájikstan astanasy Dýshanbede ShYU Úkimet basshylary keńesiniń kezekti otyrysyna arnalǵan maqalany oqyrman nazaryna usynyp otyr.