Saǵat beldeýiniń aýysýy: Mınıstr saǵat neshede uıyqtaıtynyn aıtty

ASTANA. KAZINFORM – Ónerkásip jáne qurylys mınıstri Qanat Sharlapaev jáne Oqý-aǵartý mınıstri Ǵanı Beısembaev Úkimettegi brıfıngte saǵat beldeýiniń aýysýy týraly suraqtarǵa jaýap berdi.

«Eger medıtsına mamandary qazirgi jaǵdaı densaýlyqqa óte zııan ekenin aıtyp, Qazaqstanǵa birneshe saǵat beldeýi qajet dese, Úkimet saǵat tiline ózgeris engize me? Saǵat 16:30-da kúnniń batýy jóninde ózderińiz ne oılaısyzdar jáne saǵat neshede uıqyǵa jatasyzdar?», - dep suraq qoıdy tilshiler laýazymdy tulǵalarǵa. 

Óz kezeginde Ǵanı Beısembaev esh boljam jasamaýdy jáne medıtsınalyq zertteýlerdi kútýdi usyndy. 

«Jumysbastylyq pen qaǵazbastylyqty eskersek, saǵat 23:00-den erte uıyqtamaımyn», - dedi Oqý-aǵartý mınıstri. 

Ónerkásip mınıstri Qanat Sharlapaev ta áriptesiniń pikirin qoldady. 

«Aldymen zertteý nátıjelerin kútip, naqty nátıjelerge súıenip, osy máselege qaıta oralamyz. Al meniń qaı ýaqytta uıyqtap-oıanatynym – keshirińiz, bul meniń jeke sharýam. Bul meniń qyzmettik mindetterimdi oryndaýyma esh kedergi keltirmeıdi, sondyqtan bul suraqqa jaýap bermeımin», - dedi Q. Sharlapaev. 

Aıta keteıik, elimizde ýaqyt beldeýin zertteýge 160 mln teńge jumsalmaq.