Saǵat aýystyrý: Eýropa elderi qyzý talqylap jatyr
OSLO. QazAqparat – Ótken demalys kúni álemniń kóptegen elderi saǵat tilin qysqy ýaqytqa aýystyryp – bir saǵat keıinge jyljytty. Búginde 76 elde qysqy jáne jazǵy ýaqytqa kóshý júrip jatyr, keıbir elder bul ádisti óz memleketiniń barlyq aýmaǵynda qoldanbaıdy. Bul týraly QazAqparat tilshisi habarlaıdy.
Ýaqytty aýystyrýdy belsendi qoldanatyndar – Eýropa qurlyǵynyń elderi. Osyǵan baılanysty Eýropa elderinde qyzý pikirtalas júrip jatyr. Mysaly, naýryzda Eýrokomıssııa odaqtyń qatysýshy elderine osy máseleni sheshý úshin eki jyl ýaqyt berdi. Kóktemde Eýroparlament osy tájirıbeni toqtatý týraly fın eliniń bastamasyna daýys berdi. Tıisti sheshim 2021 jyly kúshine enýi tıis.
Ár memleket ózine qolaıly nusqany tańdaıdy. Biraq, belgili bolǵanyndaı, Eýropa memleketteriniń basshylary komıssııa tarapynan jasalǵan qysymǵa qaramastan, tolyqtaı tańdaý jasaýǵa asyqpaı otyr.
Atap aıtqanda, Germanııa ekonomıka mınıstri Peter Altmaıer bir dúnıeni ózgertpes buryn, Eýrokomıssııa EO elderine jyl saıynǵy ýaqyt aýystyrýdan bas tartýdyń barlyq saldarlaryn naqty baǵalaýdy usynýy kerek dep esepteıdi.
Eýropalyq dárigerler mundaı tájirıbeniń adam densaýlyǵyna qaýipti ekenin aıtyp, dabyl qaǵýda. Onyń saldary kóktemde ýaqyt bir saǵat artqa aýysqanda aıtarlyqtaı qaýipti. Olardyń pikirinshe, uıqyǵa qatysty álemdegi osyndaı iri tájirıbe júrek ustamasy men qaıǵyly jaǵdaılar qaýpin arttyryp otyr. Al, bul tájirıbege 1,6 mlrd adam qatysýda. Zertteý kórsetkendeı, EO-daǵy adamdardyń 84%-y jazǵy ýaqytqa aýysýdan qutylǵysy keledi.
«Kóktemde uıqynyń bir saǵatyn joǵaltqan kezde kelesi kúni-aq júrek ustamasy jaǵdaılary 24%-ǵa artady. Kúzde uıqy qanǵan kezde júrek ustamasy 21%-ǵa tómendeıdi. Mundaı tendentsııa kólik apattary men óz-ózine qol jumsaýda da baıqalyp otyr», - dep jazady Harvest onlaın-jýrnaly.
Alǵash ret saǵat tili 1908 jyly Ulybrıtanııada jazda bir saǵat alǵa jáne qysta bir saǵat artqa aýysty. Bul ıdeıany Bendjamın Franklın usynǵan dep esepteledi. AQSh-ta ýaqytty aýystyrý 1918 jyly ǵana qoldanyldy.
