Saǵat 23:45-tegi jaǵdaı: Qaraǵandyda 13 kenshini izdestirý jalǵasyp jatyr
Órttiń sońy jarylysqa ulasqan apattan soń Kostenko shahtasynda qalyp qoıǵan 13 kenshini tabý múmkin bolmaı jatyr, dep habarlaıdy Kazinform.
«13 shahter áli tabylmady. Olardy izdestirý jumystary túni boıy jalǵasady. Qutqarýshylar olardy anyqtaý is-qımyldaryn toqtatqan joq», – dedi Kásibı áskerılendirilgen apattyq-qutqarý qyzmetteriniń Respýblıkalyq ortalyq shtaby Qaraǵandy fılıaly dırektorynyń birinshi orynbasary Gennadıı Sılınskıı Kazinform tilshisine bergen suhbatynda.
Eske salaıyq, 28 qazan kúni túngi saǵat 02.33-te Qaraǵandy oblysyndaǵy Kostenko atyndaǵy shahtada órt boldy. Jer astynda 252 adam bolǵan, olardyń 205-i birden joǵary shyǵaryldy.
Saǵat 17.33-tegi málimet boıynsha 33 kenshiniń denesi tabyldy,13 adam izdestirilip jatyr. 20 jumysshy aýrýhanaǵa jetkizildi.
Keıin «ArselorMıttal Temirtaý» AQ-ǵa tıesili 8 shahtanyń jumysy ýaqytsha toqtatyldy.
Keshqurym brıfıng ótkizgen Tótenshe jaǵdaılar mınıstri Syrym Sháriphanov jer astynda qalǵan 13 kenshini tiri tabýǵa úmit óte az ekenin málim etti.
Mert bolǵan kenshilerdiń jeke basyn anyqtaý qıynǵa túsip jatqany aıtylýda.
Prezıdent Q.Toqaev 29 qazandy jalpyulttyq aza tutý kúni etip jarııalaıtyn Ókimge qol qoıdy.
Memleket basshysy Qasym-Jomart Toqaev Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatý týraly tapsyrma berdi. Keıin Úkimettiń baspasóz qyzmeti «ArselorMıttal Temirtaý» AQ-nyń menshik quqyǵyn QR menshigine qaıtarý týraly kelisimsharttyń aıaqtalýǵa jaqyn ekenin málim etti.
QR Úkimeti apattan qaza tapqandardyń otbasylaryna qandaı kómek kórsetiletinin jarııalady.
Apatqa baılanysty Reseı, Belarýs, Ózbekstan, Qyrǵyzstan, Frantsııa prezıdentteri men Túrkııa Syrtqy ister mınıstrligi, Armenııa premer-mınıstri kóńil aıtty.Prezıdent Qasym-Jomart Toqaev Qaraǵandy oblysyndaǵy qaıǵyly oqıǵaǵa oraı kóńil aıtqan barlyq shet memleketter basshylary men qazaqstandyqtarǵa rızashylyǵyn bildirdi.
Kazinform «ArselorMıttalTemirtaý» tarıhynda qandaı apattar bolǵany týraly sholý usynǵan bolatyn.
