Saǵadıev jataqhanalar merziminen buryn salynatynyn málimdedi
ASTANA. QazAqparat - Stýdenttik jataqhanalar qurylysy merziminen buryn paıdalanýǵa beriledi. Bul týraly Ortalyq kommýnıkatsııalar qyzmetindegi baspasóz máslıhatynda QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat.
«Búginde 65 myń orynǵa arnalǵan jermen qamtamasyz etilgen JOO-lar tarapynan ótinishter kelip tústi. Baǵdarlama boıynsha JOO-lar men kolledjderi bar ár qalada jataqhanalar qurylysyn merziminen buryn oryndaımyz. Bizge kóptegen usynystar kelip tústi. Osy oraıda qurylys josparyn ázirlep qoıdyq, sondaı-aq qarjylandyrý josparyn pysyqtap jatyrmyz», - dedi mınıstr.
Onyń sózine qaraǵanda, bul baǵytta keıbir zańnamalyq ózgeristerdi qabyldaý qarastyrylyp otyr.
«Qazirgi kezde zań jobasy Májiliste. Qujat qabyldanǵannan keıin biz birqatar normatıvtik aktilerdi qabyldaımyz. Qyrkúıekte nemese jaz aılarynda birneshe qalalarda jataqhanalardyń qurylysyn bastaımyz», - dedi ol.
Esterińizge sala keteıik, naýryz aıynda QR Prezıdenti Bes áleýmettik bastama aıasynda 75 myń orynǵa arnalǵan jataqhana qurylysyn júzege asyrýdy tapsyrǵan bolatyn. 2022 jylǵa deıin elimiz boıynsha qajetti jataqhanalardy salý kózdelgen.
