Saǵadıev úzdik oqytýshylarǵa 4,5 mln teńgeden tabystady
ASTANA. QazAqparat - QR Bilim jáne ǵylym mınıstri Erlan Saǵadıev 200 ǵalymǵa «Joǵary oqý ornynyń úzdik oqytýshysy - 2016» ataǵyn tabystady. Saltanatty shara Lev Gýmılev atyndaǵy Eýrazııa ulttyq ýnıversıtetinde ótti, dep xabarlaıdy QazAqparat tilshisi.
Osy joly atalǵan marapatqa 58 ýnıversıtettiń oqytýshylary iligip otyr. Olardyń ishinde 72 ǵylym doktory, 102 kandıdat, 18 PhD doktor, 2 magıstr men 6 aǵa oqytýshy bar. Grant ıegerleri jańa talaptar boıynsha iriktelgen. Oǵan sáıkes, úmitkerlerdiń sońǵy bes jyldaǵy qyzmeti baǵalanyp, oqýlyqtar, oqý quraldary men monografııalardy aǵylshyn tilinde ázirleý men basyp shyǵarý, shet tilinde onlaın kýrstardy meńgerý jáne taǵy basqa biliktilikti arttyrý sharalary eskerildi. Osydan bastap atalǵan marapat bir adamǵa on jylda bir ret beriletin bolady.
Aıta ketke jón, 200 oqytýshyǵa «Joǵary oqý ornynyń úzdik oqytýshysy» ataǵymen birge 2000 AEK (1 AEK - 2269 teńge - red.), ıaǵnı 4 538 000 teńge kólemindegi grant tabystalyp otyr. Atalǵan aqsha ǵylymǵa jumsalýy tıis. Osyǵan oraı, bıyl alǵash ret jumystyń jyldyq joba-kestesi baǵalandy. Oǵan sáıkes, ataq ıegerleri grant esebinen álemniń úzdik ýnıversıtetterinde ǵylymı-zertteý jumystaryn júrgizý jáne biliktilikti arttyrý maqsatynda tájirıbeden óte alady.
