Saǵadıev Úkimet basshysyna otandyq ǵylymdy damytý josparyn baıandady
ASTANA. QazAqparat - 6 naýryz kúni Úkimet úıinde Premer-Mınıstr Baqytjan Saǵyntaevtyń tóraǵalyǵymen QR Úkimetiniń janyndaǵy Joǵary ǵylymı-tehnıkalyq komıssııanyń otyrysy ótti, dep habarlaıdy QazAqparat primeminister.kz saıtyna silteme jasap.
Otyrys barysynda otandyq ǵylymdy damytý máselesi talqylandy. Sonyń ishinde, 2018-2020 jyldarǵa arnalǵan ǵylymı, ǵylymı-tehnıkalyq baǵdarlamalardy baǵdarlamalyq-maqsatty qarjylandyrý josparlary qaraldy.
Bul másele boıynsha bilim jáne ǵylym mınıstri Erlan Saǵadıev baıandama jasady.
Sondaı-aq talqylaýǵa Joǵary ǵylymı-tehnıkalyq komıssııa músheleri qatysty: QR Premer-Mınıstriniń orynbasary E. Dosaev, qorǵanys jáne aeroǵarysh ónerkásibi mınıstri B. Atamqulov, qarjy mınıstri B. Sultanov, «Qazaqstan Respýblıkasynyń ulttyq ǵylym akademııasy» respýblıkalyq qoǵamdyq birlestiginiń prezıdenti M. Jurynov, «QazMunaıGaz» óndirý jáne burǵylaý tehnologııalary ǵylymı-zertteý ınstıtýty» JShS bas dırektorynyń keńesshisi J. Kúlekeev jáne taǵy basqalary.
Ǵylymı jáne ǵylymı-tehnıkalyq baǵdarlamalar ártúrli salalarda, sonyń ishinde tabıǵı resýrstardy utymdy paıdalaný; energetıka jáne mashına jasaý; aqparattyq, telekommýnıkatsııalyq jáne ǵaryshtyq tehnologııalar; jaratylystaný ǵylymdary, ómir týraly ǵylymdar jáne densaýlyq salasyndaǵy ǵylymı zertteýler, «Máńgilik el» ǵylymı negizderi jáne taǵy da basqa baǵyttar boıynsha usynylǵan.
