Saǵadıev shveıtsarııalyq kásipkerlermen birge «Arystan» lıtseıine bardy
ALMATY. QazAqparat - QR Bilim jáne ǵylym mınıstri Erlan Saǵadıev pen «Nursultan Nazarbaevtyń bilim berý qory» Qoǵamdyq qorynyń dırektory Dınara Qulybaeva Almaty oblysyndaǵy «Arystan» mamandandyrylǵan lıtseıin aralady, dep habarlady QazAqparat.
«Arystan» mamandandyrylǵan lıtseıine E.Saǵadıev jáne D.Qulybaeva shveıtsarııalyq kásipkerlerdi alyp bardy. Qonaqtardy saltanatty túrde áskerı dástúr boıynsha lıtseı basshysy, zapastaǵy general-maıor Sábıt Taýlanov qarsy aldy.
Meımandar bilim oshaǵynyń kúndelikti ómiri, oqýshylardyń sabaqqa qatysýy men shyǵarmashylyq qabiletin baǵalady.
Lıtseı «Nursultan Nazarbaevtyń bilim berý qory» qoǵamdyq qory negizinde ashylǵan. Ol Almaty oblysy Talǵar aýdany Besqaınar aýylynda ornalasqan. Qaıyrymdylyq negizinde munda Qazaqstannyń barlyq aımaǵynan kelgen 9-11 synyp aralyǵyndaǵy 240 er bala oqıdy.
Bıyl jyl basynda, qańtar aıynda lıtseı óziniń 5 jyldyǵyn atap ótti. Lıtseıdiń túlekteri qazaqstandyq jáne sheteldik áskerı oqý mekemelerinde oqýlaryn tabysty jalǵastyryp jatyr.
