Saǵadıev: Sheteldegi qazaq balalaryna bólinetin oqý granttary artyp keledi
«Biz jyl saıyn Mońǵolııadaǵy qazaq balalary úshin oqý kitaptaryn kóptep jiberemiz. Mońǵolııanyń Baıan-Ólgeı aımaǵynda birqatar qazaq mektepteri bar. Mońǵolııadan sonymen birge, stýdentterdiń kóp kelip jatqanyn da aıta ketý kerek. Biz bıyl ǵana osy baǵytta 55 bilim grantyn bóldik. Jyl saıyn suranys artyp kele jatqandyqtan, bizge bul jaǵdaı, álbette, unaıdy», - dedi mınıstr Mońǵolııadan kelgen búrkitshi qyz Aısholpan Nurǵaıypqyzy jáne onyń anasymen kezdesýden keıin tilshilerge bergen suhbatynda.
Erlan Saǵadıev qazaqstandyq JOO granttary tek mońǵolııalyq qazaq stýdentterine ǵana emes, Ózbekstan, Qyrǵyz Respýblıkasy, Qytaı sekildi ózge elderdegi qandastarymyzǵa da bólinetinin atap ótti.
«Sheteldik qazaqtarǵa arnalǵan grant sany jyl sanap kóbeıip jatyr. Qazaqstanǵa shettegi qandastar kóp keledi. Kópshiligine elimizdegi JOO-lar unaıdy. Osynda qalyp, jumys istep, Qazaqstan azamattyǵyn alyp jatqandar da jeterlik. Óte qýanyshty jaǵdaı dep aıtar edim. Grant sanyn arttyryp, ózimizdiń baǵdarlamany olardyń oqyǵan baǵdarlamasyna sáıkestendirip, jaǵdaıyn jasap otyrmyz. Sheteldegi qazaq balalary osynda oqýǵa kelgende olarǵa jataqhanadan oryn berilip, shákirtaqy tólenedi. Óz tarapymyzdan olarǵa bar jaǵdaıdy jasap otyrmyz», - dedi Erlan Saǵadıev.
Eske sala ketsek, búgin Astanada QR Bilim jáne ǵylym mınıstri Erlan Saǵadıev Mońǵolııadan kelgen búrkitshi qyz Aısholpan Nurǵaıypqyzymen jáne onyń anasymen kezdesken bolatyn. Jıyn barysynda mınıstr Aısholpanǵa qalaǵan ýnıversıtetine túsýge kómektesýge ýáde berdi.
