Saǵadıev mektep tenderimen kóp «oınaǵan» aımaqtardy atady
ASTANA. QazAqparat - Aǵymdaǵy jyly respýblıka boıynsha 109 mekteptiń qurylysyna Ulttyq qordan 71,7 mlrd teńge bólingen bolatyn. Sonyń 45,2 mlrd-y jańa 56 mekteptiń qurylysyn bastaýǵa bólinse, qalǵan 26,5 mlrd teńgesi buryn bastalǵan 53 mekteptiń qurylysyna quıyldy, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, bıyl barlyǵy 76 mektepti paıdalanýǵa berý josparlanǵan. Ákimdikterdiń málimeti boıynsha, 1 qyrkúıekke deıin 52 mektep tapsyryldy. Jyldyń aıaǵyna deıin taǵy 24 nysannyń qurylysy aıaqtalady. Qalǵany kelesi jylǵa qalyp otyr.
Keıinge qalǵan keıbir mektepterdiń qurylysyn erterek bitirýge bolatyn edi. Alaıda bıýdjet qarajatyn ýaqytynda ıgerilmeýinen qurylys jumystary kelesi jylǵa shegerildi. "Máselen, Aqmola oblysy Şýchınsk qalasynda 750 mln teńgeniń mektep qurylysy keıinge qalyp otyr. Ol jaqta qurylysshylar arasyndaǵy daý-damaı sotqa deıin jetti. Mańǵystaý oblysynda 1,5 mlrd teńgeniń tórt mektebi boıynsha konkýrstyq protsedýralar kesh ótkizildi. Ońtústik Qazaqstan oblysynda bes mektep boıynsha 600 mln teńge der kezinde ıgerilmeı qaldy. Onda da konkýrstyq protsedýralar kesh uıymdastyryldy", - dedi Saǵadıev Úkimettiń búgingi otyrysynda.
Aıta keteıik, otyrys barysynda QR Premer-Mınıstri Baqytjan Saǵyntaev memlekettik tapsyrys aıasynda mektepterdi der kezinde paıdalanýǵa berý máselesine basa nazar aýdardy. Sebebi "aǵataılar tendermen uzaq oınap jatqannan keıin balalar mektepke ýaqytynda bara almaı júredi" .
