Saǵadıev: Kolledjderdiń maman daıarlaý júıesi ózgeredi
ASTANA. QazAqparat - Kelesi jyldan bastap kolledjderdiń reıtıngi jasalady. Soǵan qaraı árbir kolledjdiń oqý baǵdarlamasy da, memlekettik tapsyrystyń kólemi de ózgeretin bolady, dep xabarlaıdy QazAqparat tilshisi.
QR Bilim jáne ǵylym mınıstri Erlan Saǵadıevtiń aıtýynsha, reıtıng kolledj túlekteriniń jumysqa turý kórsetkishine negizdeledi. Eger belgili bir kolledjdiń kórsetkishi tómen bolsa, onda ol baǵytta maman daıarlaý toqtatylady. "Qazirdiń ózinde kásibı-texnıkalyq bilim salasynda bir-bir qaıtalaıtyn jáne eshbir suranysy joq 109 mamandyq qysqartyldy. Sonyń nátıjesinde 66 kolledjdiń salalyq baǵyty ózgerdi. Al 20 oqý orny bir-birine qosyldy. Osy saladaǵy jumys jalǵasa beredi. Biz jas mamandardyń jumysqa turý kórsetkishine basa nazar aýdaramyz. Mamandyqqa durys úıretpese, túlekter jumysqa tura almasa, ol mamandyqtyń lıtsenzııasyn keri qaıtaramyz", - dedi E.Saǵadıev Tamyz konferentsııasynyń plenarlyq májilisinde.
Aıta keteıik, aldaǵy ýaqytta mınıstrlik joǵary bilim sapasyn da jiti baqylaýdy josparlap otyr. "Byltyr memlekettik granttardyń sany 10 myńǵa artty. Bıyl taǵy 20 myń grant bólindi. Demek, onymen birge joǵary oqý oryndarynyń jaýapkershiligi artady. Biz bilim sapasyna basa nazar aýdaramyz. Al bul máseleni qalaı qadaǵalaımyz? Birinshiden, jas mamandardyń jumysqa turý reıtıngi boıynsha árbir joǵary oqý ornynyń jumysyn baǵalaımyz. Eger atalǵan kórsetkish tómen bolsa, onda sol mamandyq boıynsha lıtsenzııany keri qaıtaratyn bolamyz. Bul - basty kórsetkish. Sebebi jumys naryǵynda árbir túlekke suranys bolýy qajet", - dep atap kórsetti E.Saǵadıev.
