Saǵadıev Qazaqstan mektepterindegi oryn jetispeýshiliginiń sebebin túsindirdi
ASTANA. QazAqparat - QR Parlamenti Májilisiniń jalpy otyrysynda QR Bilim jáne ǵylym mınıstri Erlan Saǵadıev respýblıka mektepterindegi oryn jetispeýshiligi máselesin sheshý boıynsha júrgizilip jatqan sharalardy baıandady, dep habarlaıdy QazAqparat tilshisi.
«2018 jylǵa arnalǵan bıýdjet jobasynda mektep qurylysyna shamamen 40 mlrd teńge qarastyrylǵan. Alaıda bıýdjettik ótinim 66 mlrd teńgege toltyrylǵan. Munda ótinim tolyq qanaǵattandyrylmaǵan. Onyń ústine jańa mektepter qajettilik óte az Aqmola, Qaraǵandy, Mańǵystaý oblystarynda salynady. Halyq tyǵyz qonystanǵan OQO, Aqtóbe oblystary jáne Astana, Almaty qalalary emes pe", - dep saýal joldady depýtat Ýálıhan Qaınazarov Úkimet basshysy Baqytjan Saǵyntaevqa.
Saǵadıev atalǵan máseleni sheshýdiń birneshe joldary qarastyrylyp jatqanyn atap ótti.
«Mektepterdegi oryn jetispeýshiligi máselesine kelsek, bul málimet ulttyq bilim berýdiń derekter bazasynan alynǵan. Atalǵan baza jumys istep tur jáne osy arqyly qaı óńirde, qaı mektepte qansha oryn jetispeıtinin bile alamyz. Ekinshiden, apatty jaǵdaıdaǵy mektepterdi joıýǵa arnalǵan baǵdarlama bar. Bul da esepke alynady. Úshinshi faktor - ol úsh aýysymdaǵy mektepter máselesin sheshý. Tórtinshiden, mektep salý týraly oblystar beretin qujattar», - dedi mınıstr.
BǴM basshysy keltirgen derekterge sáıkes, bıyl 112 mektep salyndy nemese salynyp jatyr.
"Bul Qazaqstan bir ýaqytta salyp jatqan mektep sany boıynsha rekordtyq kórsetkish. Áıtkenmen, respýblıka mektepterindegi oryn jetispeýshiligi máselesi saqtalady. Sebebi, biz halyqtyń iri qalalarǵa jappaı qonystanýy faktoryna tap boldyq. Taǵy bir mindetterdiń biri - mektepterdi salýǵa jeke sektordy tartý», - dedi Saǵadıev.
Onyń aıtýynsha, bul baǵyttaǵy tájirıbeni elimizde kóptep salynǵan balabaqshalardan alý qajet.
