Saǵadıev: Bıyl 68 nysandy bitirip, 14 jańa mektep qurylysyn bastaý kerek
ASTANA. QazAqparat - Bıyl 68 nysandy bitirip, 14 jańa mektep qurylysyn bastaý kerek. Bul týraly búgin QR Úkimeti otyrysynda elimizdiń Bilim jáne ǵylym mınıstri Erlan Saǵadıev aıtty.
«2016 jylǵy respýblıkalyq bıýdjetti naqtylaý kezinde qosymsha 14 mekteptiń qurylysyn bastaýǵa sheshim qabyldandy. Sonymen, bıyl 68 nysandy bitirip, 14 jańa mektep qurylysyn bastaý kerek. Buǵan qosa, úsh óńirde 8 nysannyń paıdalanýǵa berý merzimi saqtalmaı otyr», - dedi E.Saǵadıev.
Mınıstrdiń aıtýynsha, olar: Atyraý qalasynyń «Nursaıa» shaǵyn aýdanyndaǵy mektep, Birlik aýylyndaǵy balabaqsha, Maqat aýdandyq Dossor orta mektebi; Shyǵys Qazaqstan oblysyna qarasty Rıdder qalasyndaǵy Mıchýrın balabaqshasy, Tarbaǵataı aýdanyndaǵy Jetiaral mektebi jáne osy aýdandaǵy Aqjar mektebi.
«Astana qalasy boıynsha eki nysan - 17 mektep-gımnazııa men 22 mekteptiń qosymsha qurylysy. Osyǵan oraı, jergilikti atqarýshy organdardan kórsetilgen problemalyq máselelerge arnaıy nazar aýdaryp jáne olardyń qurylysyn aıaqtap paıdalanýǵa berý boıynsha naqty tapsyrma berýińizdi suraımyz», - dedi mınıstr Úkimet basshysy B.Saǵyntaevqa qarata.
