Saǵadat Nurmaǵambetovtiń 100-den astam qundy jádigeri Áskerı-tarıhı mýzeı qoryna tapsyryldy
ASTANA. KAZINFORM — Qazaqstan Respýblıkasynyń tuńǵysh Qorǵanys mınıstri, Keńes Odaǵynyń Batyry, Halyq qaharmany, armııa generaly Saǵadat Nurmaǵambetovke tıesili 100-den astam biregeı jádiger Qarýly kúshterdiń Ulttyq áskerı-patrıottyq ortalyǵy janyndaǵy Áskerı-tarıhı mýzeı qoryn tolyqtyrdy.
Mýzeıge tapsyrylǵan qundy eksponattardyń qatarynda memlekettik nagradalar, jeke qujattar, áskerı kıim úlgileri, ataýly jáne syılyq berilgen qarýlar, sondaı-aq aty ańyzǵa aınalǵan qolbasshynyń ómir joly men áskerı qyzmetin aıǵaqtaıtyn ózge de tarıhı qundylyqtar bar.
Saǵadat Nurmaǵambetovtiń ómiri men qyzmetine qatysty bul baǵaly jádigerlerdi mýzeıge batyrdyń qyzy Aısulý Nurmaǵambetova men nemeresi Saýyq Nurmaǵambetov tabystady.
Saltanatty rásimge Qazaqstan Respýblıkasynyń Qorǵanys mınıstri avıatsııa general-leıtenanty Dáýren Qosanov, Qorǵanys mınıstrliginiń basshylyq quramy, áskerı qyzmetshiler, Qarýly kúshterdiń ardagerleri, sondaı-aq dańqty qolbasshynyń týǵan-týystary men jaqyndary qatysty.
Іs-shara barysynda sóz sóılegen Qorǵanys mınıstri Saǵadat Nurmaǵambetovtiń jeke zattarynyń Áskerı-tarıhı mýzeı qoryna tapsyrylýynyń tarıhı mańyzy zor ekenin atap ótti. Ol Saǵadat Qojahmetulynyń otbasyna baǵa jetpes murany el ıgiligine aınaldyrǵany úshin shynaıy rızashylyǵyn bildirip, bul jádigerler ulttyq muranyń ajyramas bóligine aınalyp, kópshilikke qoljetimdi bolatynyn, ári jas urpaqtyń áskerı-patrıottyq tárbıesine úlken úles qosatynyn aıtty.
— Qazaqstan Respýblıkasynyń tuńǵysh Qorǵanys mınıstri, Keńes Odaǵynyń Batyry, Halyq qaharmany, armııa generaly Saǵadat Qojahmetuly Nurmaǵambetovtiń jeke zattaryn Áskerı-tarıhı mýzeı qoryna tapsyrý — halqymyzdyń áskerı murasyn saqtaýǵa baǵyttalǵan mańyzdy qadam. Bul jádigerler — jaı ǵana mýzeı eksponattary emes, táýelsiz Qazaqstan Qarýly kúshteriniń qalyptasý tarıhyn, Otanǵa adal qyzmet etken kórnekti qolbasshy ári memleket qaıratkeriniń ónegeli ómir jolyn aıshyqtaıtyn asyl mura, — dedi Qorǵanys mınıstri.
Óz kezeginde Aısulý Nurmaǵambetova bul sheshimdi ulymen birge qabyldaǵanyn aıtty. Onyń aıtýynsha, otbasy úshin asa qymbat dúnıelermen qoshtasý ońaı bolmaǵanymen, olardy halyq ıgiligine aınaldyrýdy jón sanaǵan.
— Ulym ekeýmiz ákemizdiń nagradalary men jeke zattary dál osy mýzeıden laıyqty oryn alýy tıis dep sheshtik. Bul jádigerler jastardyń sol dáýirdiń rýhyn tereńirek túsinýine, Saǵadat Qojahmetulynyń eline jáne halqyna sheksiz adal bolǵan tulǵa ekenin tanýyna yqpal etedi dep senemiz. Bizdiń otbasy úshin bul jádigerler — tek ákemizdiń ǵana emes, soǵys maıdanynda erlik kórsetken, tylda aıanbaı eńbek etken barlyq ardagerler men aǵa býynǵa degen qurmettiń belgisi, — dedi Aısulý Saǵadatqyzy.
Áskerı-tarıhı mýzeıde buǵan deıin de Saǵadat Nurmaǵambetovke arnalǵan jeke ekspozıtsııa jumys istep keledi. Endi ol 100-den astam jańa biregeı jádigermen tolyqty. Olardyń qatarynda memlekettik nagradalardyń túpnusqasy, áskerı kıim úlgileri, jeke qujattar bar. Ekspozıtsııadaǵy eń qundy jádigerlerdiń biri — Qazaqstan Respýblıkasynyń joǵary memlekettik nagradalarynyń biri sanalatyn «Otan» ordeni. Sonymen qatar mýzeı qoryna Saǵadat Qojahmetulyna ár jyldary syıǵa tartylǵan ataýly jáne syılyq qarýlar da tapsyryldy.
Aıta ketelik Gennadıı Golovkın Ulttyq ulan mýzeıine boks qolǵabyn tabystaǵan edi.
