Saǵadat Nurmaǵambetovti eske alý týrnıri: Qazaqstan quramasy 35 medal jeńip aldy
ASTANA. KAZINFORM — Chempıondyq belbeý synǵa túsken sharshy alańda Qazaqstan, Qyrǵyzstan, Qytaı, Tájikstan jáne Ózbekstannan kelgen 130 bylǵary qolǵap sheberi baq synasty, dep habarlaıdy Qorǵanys mınıstrliginiń baspasóz qyzmeti.
Armııa ortalyq sport klýbynda Keńes Odaǵynyń Batyry, Halyq qaharmany armııa generaly Saǵadat Nurmaǵambetovke arnalǵan XXIX halyqaralyq boks týrnıri aıaqtaldy.
Týrnırdiń qurmetti qonaqtary qatarynda QR Qarýly kúshteri Desanttyq-shabýyldaý áskerleriniń qolbasshysy polkovnık Maqsut Gýseınov, batyrdyń qyzy Aısulý Nurmaǵambetova, Áskerı-qoldanbaly sport túrleri federatsııasynyń prezıdenti Bolat Baıjan, Nomad Wrestling uıymynyń prezıdenti Maqsat Qıqymov, Olımpıada chempıony Ermahan Ybraıymov jáne Olımpıada oıyndarynyń qola júldegeri Qanat Islam boldy.
Jarystyń jabylý rásiminde týrnırge qatysýshylardy QR Qorǵanys mınıstrligi Sport komıtetiniń tóraǵasy — Armııa ortalyq sport klýbynyń bastyǵy polkovnık Arman Ábeýov quttyqtady.
— Halyqaralyq boks týrnıri jyl saıyn dástúrli túrde ótkizilip keledi. Bul — Keńes Odaǵynyń Batyry, Halyq qaharmany Saǵadat Nurmaǵambetovteı kórnekti qolbasshyny jadymyzda saqtap, eske alýǵa arnalǵan saıys. Jekpe-jek barysynda sizder naǵyz jaýyngerge tán kúsh-jigerdi, tózimdilik pen jeńiske degen erik-jigerdi kórsettińizder. Týrnır sporttyq dástúrlerdi nyǵaıtyp, sheberlikti shyńdaýǵa yqpal etken mańyzdy shara boldy, — dep atap ótti ol.
Komandalyq esepte Qazaqstan quramasy 9 altyn, 9 kúmis jáne 17 qola medal oljalap, birinshi oryn enshiledi. Ózbekstan quramasynyń qorjynynda bir altyn jáne bir kúmis medal bolsa, Tájikstan sportshylary eki qola júlde, al Qyrǵyzstan quramasy bir qola medal ıelendi.
Saıystyń qorytyndysy boıynsha AOSK ókilderi Sáken Bıbosynov (55 kelige deıin) pen Beknur Batyrbek (85 kelige deıin), sondaı-aq elimizdiń atynan synǵa túsken Ernar Qarap (50 kelige deıin), Asyljan Serikbaı (60 kelige deıin), Abzal Serik (65 kelige deıin), Ernur Súıinbaı (70 kelige deıin), Erkebulan Shaıkenov (75 kelige deıin), Nurqanat Raıys (80 kelige deıin) jáne Dýman Nurjan (90 kelige deıin) chempıon atandy. Al 90 keliden joǵary salmaqta ózbekstandyq Madııar Saıdrahımov jeńiske jetti.
Týrnır sharshy alań sheberlerine qarsylastarynyń tehnıkasyn baǵalap, taktıkalyq daıyndyq deńgeıin arttyrýǵa jáne sporttyq rýhty nyǵaıtýǵa múmkindik berdi.
Budan buryn Qazaqstan boksshylary 2025 jyly halyqaralyq jarystarda 113 medal jeńip alǵanyn jazdyq.
