Safýan Shaımerdenov dúnıege kelgen Amangeldi aýylynda bir ǵana úı qalǵan

PETROPAVL. QazAqparat – Soltústik Qazaqstan oblysynda jerles jazýshy Safýan Shaımerdenovtyń ǵasyrlyq mereıtoıyna oraı birqatar is-shara ótti, al Amangeldi aýylyndaǵy týǵan úıine memorıaldyq taqta qoıyldy, dep habarlaıdy QazAqparat tilshisi.

Safýan Shaımerdenovtiń 100 jyldyq mereıtoıy Petropavlda «Sóz zergeri – Safýan» atty shyǵarmashylyq keshpen ashyldy. Oǵan jazýshynyń áriptesteri belgili qalamgerler, qoǵam qaıratkerleri, týǵan-týystary qatysyp, estelikterimen bólisti. Al negizgi is-shara ekinshi kúni Safýannyń kindik qany tamǵan Amangeldi aýylynda ótti. Aq shańqan kıiz úıler tigilip, ulan asyr toı uıymdastyryldy.

Meımandar jazýshynyń týyp-ósken úıinde bolyp, «Sháımerden áýletiniń qarashańyraǵy» dep jazylǵan memorıaldyq taqtanyń ashylý rásimine qatysty.

«Bul qarashańyraqqa ákemiz tiri kezinde Sábıt Muqanov, Ǵabıt Músirepov te kelgen. Ózimen qatarlas júrgen Tahaýı Ahtanov, Ábdijámil Nurpeıisov sekildi qazaqtyń marǵasqalarynyń bári osy úıde bolyp, qarashańyraqtan dám tatty. Sondyqtan bul úıdi el kóship ketse de biz buzbaı saqtap otyrmyz. Aýyl qaıtadan ornyna keledi dep oılaımyn. Sebebi 150 jyldyǵy ótip jatqan Ahmet Baıtursunovtyń aýyly eki ret jabylyp, eki ret qaıtadan ornyna kelgen eken», - deıdi Safýan Shaımerdenovtyń uly, belgili jýrnalıst Saıyn Shaımerden.

Safýan Shaımerdenovtyń «Bolashaqqa jol» atty alǵashqy romany 1953 jyly jaryq kórdi. Bul týyndy keıin «Inesh» degen ataýmen orys tiline aýdaryldy. «Ómir nury» atty povester tsıkline «Mezgil», «Qarǵash», «Ómir nury», «It ashýy», «Májnún tal» atty shyǵarmalary kirgen. Olar shetel tilderine áldeneshe ret aýdarylǵan. Ózi de aýdarmamen aınalysty. R.Tagordyń «Kúıreý» romanynyń aýdarmasy úshin 1984 jyly Qazaqstan Jazýshylar odaǵynyń syılyǵyn, «Aǵalardyń alaqany», «Ádebı tolqyndar» atty kitaptary úshin 1988 jyly respýblıkanyń Abaı atyndaǵy Memlekettik syılyǵyn aldy.

«Safýan Shaımerdenov bizdiń ulttyq ádebıetimizdi bıikke kótergen klassıigimiz ǵana emes, ol ultymyzdyń ar-uıatyna aınalǵan úlken azamat. Ol bizdiń qanshama urpaqqa úlgi bolatyn ónegeli is tyndyrǵan qaıratker. Qazaq jazýshysy eger myqty bolatyn bolsa, kórkem ádebıet arqyly ultty tárbıeleý mindetin ǵana emes, ol qaıratkerlik mindetti de atqarady. Sol mindettiń bıiginen tabylǵan aǵamyz keshegi jeltoqsanda jastardy arashalap, respýblıkanyń eń bıiginde turǵan kisilerdiń aldynda óziniń oı tujyrymdaryn aıtty», - dedi QR Prezıdentiniń keńesshisi, Ulttyq ǵylym akademııasynyń akademıgi Baýyrjan Omarov.

1992 jyly Safýan Shaımerdenov Halyq jazýshysy qurmetti ataǵyna ıe boldy.

Foto: novoetv.kz