Safııa, Sadııa, Samııa: Túrkistan oblysynda úshem ómirge keldi
TÚRKІSTAN. KAZINFORM – Túrkistan oblysyndaǵy №2 perınataldyq ortalyqta úshem dúnıege keldi. Úsheýi de qyz bala. Týystary sábılerge Safııa, Sadııa jáne Samııa degen esimder berdi.
Dárigerler 4 mamyrda júktiliktiń 32 aptasynda medıtsınalyq kórsetkishterge saı anaǵa kesar tiligin jasap, nárestelerdi aman-esen bosandyryp alǵan.
Oblystyq densaýlyq saqtaý basqarmasynyń málimetinshe, sábılerdiń týǵan kezdegi salmaqtary 1775, 1990 jáne 1850 gramm bolǵan.
– Qazirgi tańda merziminen buryn týǵan nárestelerdiń jaǵdaıy turaqty. Úshemderge týystary Safııa, Sadııa jáne Samııa esimderin qoıǵan, – delingen habarlamada.
Sábılerdiń anasy 38 jastaǵy Tursynaı Orynbaeva Saıram aýdanyndaǵy Qaramurt aýylynda turady. Mamandyǵy – defektolog-logoped. Ákesi Mamýrjan Orynbaev eńbek pániniń muǵalimi bolyp qyzmet atqarady. Otbasy buǵan deıin de eki qyz ben bir uldy tárbıelep otyr.
Anasynyń aıtýynsha, júktiliktiń 14 aptasynda №2 oblystyq perınataldyq ortalyqtyń ana men balany qorǵaý bóliminde ýltradybystyq zertteý kezinde dárigerler úshem kútip otyrǵanyn habarlaǵan.
– Bul jańalyqty estigen sátte erekshe tolqynys pen qobaljý sezimin bastan ótkerdim, – deıdi kópbalaly ana.
Úshemder 22 táýlikten keıin úılerine 2018, 2010 jáne 2008 gramm salmaqpen shyǵaryldy. Sábıler osy ýaqyt aralyǵynda nárestelerdiń jan saqtaý bólimshesinde jáne arnaıy kútimdi qajet etetin bólimshede qajetti medıtsınalyq baqylaýdan ótip, jaǵdaılary tolyq turaqtanǵan.
Búginde ana men sábılerdiń densaýlyǵy jaqsy. Dárigerler sábılerge der kezinde medıtsınalyq kómek kórsetip, olardyń ómirge beıimdelýine jan-jaqty qoldaý jasady. Sábılerdiń ata-anasy medıtsına qyzmetkerlerine shynaıy alǵystaryn bildirdi.
Aıta keteıik, №2 oblystyq perınataldyq ortalyqta 2024 jyly 3 úshem dúnıege kelgen. Al 2026 jyldyń basynan beri ortalyqta 1810 náreste ómirge kelse, sonyń ishinde alǵashqy úshem jáne 35 egiz tirkelgen.
Budan buryn Túrkistanda 41 jastaǵy áıel úshemdi dúnıege ákelgenin jazǵan edik.
