Saentologııa jáne osy tektes ózge uıymdardyń is-áreketi dinniń joǵary mártebesine saı emes - Qazaqstan dintanýshylarynyń Qarary

Qatysýshylar forým qorytyndysy boıynsha Qarar qabyldady. Bul týraly QR Din isteri agenttiginiń baspasóz qyzmetinen málim etti.

Atalǵan qujatta 2011 jyly kúshine engen Qazaqstan Respýblıkasynyń «Dinı qyzmet jáne dinı birlestikter týraly» Zańynyń dinı qaýymdar qyzmetin quqyqtyq turǵyda qamtamasyz etý isinde mańyzdy qadam bolǵandyǵy atap ótildi.

Qararda dinniń qoǵamnyń rýhanı ilgerileýiniń jáne adamgershilik turǵysynan jetilýiniń mańyzdy quraly bolyp tabylaty atap ótildi. Osyǵan oraı, forým qatysýshylary azamattardyń dinı sezimderin kommertsııalyq jáne ózge de rýhanııatpen sáıkespeıtin maqsattarda paıdalanýǵa jol berilmeýine basa nazar aýdardy. «Forým qatysýshylary saentologııa jáne osy tektes ózge de uıymdardyń is-áreketi dinniń joǵary mártebesine saı emes jáne dinı birlestiktiń moıyndalǵan krıterılerine jaýap bermeıdi dep esepteıdi», - delingen Qararda.

QazAqparat qujattyń tolyq mátinin taratady.

                                                                                    * * *

Qazaqstan dintanýshylary ІІ forýmynyń Qarary  

Dintanýshylardyń ekinshi forýmy din sekildi kúrdeli fenomendi zertteý isinde sarapshylar qoǵamdastyǵynyń, úkimettik emes sektordyń, ǵylymı jáne bilim berý ınstıtýttarynyń, memlekettik organdar men dinı birlestikterdiń kúshin biriktirý jolyndaǵy mańyzdy oqıǵaǵa aınaldy.

Forýmǵa qatysýshylar 2011 jyly Qazaqstan Respýblıkasynyń «Dinı qyzmet jáne dinı birlestikter týraly» zańyn qabyldaý dinı uıymdar qyzmetin quqyqtyq qamtamasyz etý isinde mańyzdy qadam bolǵanyn atap kórsetedi. Memleket pen dinniń memlekettik-konfessııalyq qatynastar salasyndaǵy jetildirilgen zańnamalyq bazaǵa negizdelgen ózara qarym-qatynastary strategııalyq mańyzǵa ıe bolyp otyr.

Forým qatysýshylary barlyq elder men halyqtardyń beıbitshiligine, qaýipsizdigi men turaqtylyǵyna únemi qater tóndiretin ekstremızm men terrorızmniń kez kelgen túrine ymyrasyz qarsy shyǵyp, aıyptaıdy. Ekstremıstik is-áreket kórinisteri Qazaqstan Respýblıkasyndaǵy ishki turaqtylyqqa, etnosaralyq jáne dinaralyq kelisimge qaýip-qater tóndiredi.

Jıynǵa qatysýshylar radıkalızm kórinisterin joıý úshin qoǵam sanasyna ekstremızm ıdeologııasynyń enýine berik tosqaýyl qoıý, óshpendilik pen tózbeýshilik ıdeologııasynyń taralýyna ákep soǵatyn jaǵdaılardy joıý qajet dep sanaıdy. Ǵalymdardyń, dinı jáne qoǵamdyq birlestikterdiń, buqaralyq aqparat quraldary men memlekettik organdardyń kúsh-jigerin biriktire otyryp iske asyrylatyn tıimdi keshendi strategııalardy jasap shyǵarý qajet.

Forýmǵa qatysýshylar tózimdilik ıdeıalaryn taratý, dinı qundylyqtarǵa, sezimder men nanymdarǵa qurmetpen qaraýdy nasıhattaý baǵytynda jumys júrgizýge shaqyrady.

Din - qoǵamnyń rýhanı ilgerileýiniń jáne adamgershilik turǵysynan jetilýiniń mańyzdy quraly bolyp tabylady. Osyǵan oraı, Forým qatysýshylary azamattardyń dinı sezimderiniń kommertsııalyq jáne ózge de rýhanııatpen úılespeıtin maqsattarda paıdalanylýyna jol bermeý qajettiligine  nazar aýdarady. Forým qatysýshylary saentologııa jáne basqa da osyǵan uqsas uıymdardyń qyzmeti dinniń joǵary mártebesimen úılespeıtinine jáne dinı birlestiktiń keńinen tanylǵan belgilerine saı emes dep sanaıdy.

Forýmǵa qatysýshylar din máselelerin zertteıtin otandyq ǵalymdardyń turaqty jumys isteıtin pikirtalas alańy retindegi Qazaqstan dintanýshylary kongresiniń rólin oń baǵalaıdy. Dintanýshylar kongresi memlekettik-konfessııalyq jáne konfessııaaralyq qatynastar salasyndaǵy memlekettik strategııany ǵylymı turǵydan qoldaý máselelerin sheshýge sarapshylar qoǵamdastyǵyn tartýdyń eń tıimdi sharalaryn oılap tabýy qajet. Kongress sheńberinde dintaný pánin orta jáne joǵary oqý oryndarynda oqytýdyń tájirıbesin, oqýlyqtar men oqý quraldaryn qoldanýdyń praktıkasyn, dinı oqý oryndary qyzmetiniń damý baǵyttaryn talqylap, bir júıege keltirý qajet.

Din qyzmetiniń keń aýqymdy máselelerin qarastyryp, pikirtalas barysynda kóterilgen máselelerdiń mańyzdylyǵyn túsine otyryp, Forým qatysýshylary tómendegi sharalardy usynady:

• - terrorızmge qarsy áreket etýdiń jáne onyń aldyn alýdyń tıimdi júıesin qurýda memlekettik organdar qyzmetin ǵylymı-ádistemelik turǵydan qamtamasyz etý jónindegi jumystardy jandandyrý;
• - ekstremızm men terrorızmniń qaýip-qaterlerine qarsy is-qımyl júrgizýde qoǵamdyq, dinı, quqyq qorǵaýshy, jastar uıymdary jáne basqa da uıymdarmen ózara yntymaqtastyqty nyǵaıtý;
• - respýblıkalyq jáne óńirlik deńgeıde dinı ahýaldyń tartysty qyrlaryn aıqyndaý jáne ekstremızm men terrorızm kórinisteriniń aldyn alý jónindegi zertteý jobalaryn júzege asyrý;
• - elimizdiń buqaralyq aqparat quraldary tarapynan ekstremızm men terrorızmniń adamgershilikke qarsy tabıǵatyn ashyp kórsetý jáne jarııalaý jóninde jumys júrgizýdiń ártúrli ádisteri men formalaryn belsendi túrde qoldaný;
• - BAQ, dinı birlestikter men memlekettik organdar arasynda elimizdegi dinı ahýaldy jarııalaý máseleleri jóninde júıeli ózara is-qımyl júrgizý, bul rette zaıyrly BAQ-tyń dinı ahýaldy dálme-dál, syndarly baıandaý jaýapkershiligine erekshe kóńil aýdarý qajet;
• - dinı ustanymy ártúrli adamdardyń beıbit qatar ómir súrý jáne tózimdilik tuǵyrlaryn belsendi túrde nasıhattaý, túrli dinder ókilderiniń, sondaı-aq, qoǵamnyń zaıyrly bóliginiń ózara túsinistigin arttyrý úshin qoǵamdyq pikirtalastar men pikir alysýdy uıymdastyrýdyń tıimdi joldaryn qarastyrý;
• - halyqtyń quqyqtyq mádenıetin damytý, jas urpaqty tózimdilik jáne áleýmettik jaýapkershilik rýhynda tárbıeleý;
• - sonymen bir mezgilde Qazaqstan turǵyndarynyń dinı saýattylyǵyn arttyrý jáne zaıyrly bilim berýdiń sapalyq deńgeıin kóterý.

Forýmǵa qatysýshylar dinaralyq kelisimdi, ekstremızm men terrorızmge qarsy is-qımyldy kúsheıtý jónindegi memlekettik saıasatty iske asyrý baǵytynda jemisti, nátıjeli jumys atqarýǵa nıetti jáne daıyn ekenin bildiredi.