Sadyr Japarov Qyrǵyzstannyń búkil aýmaǵynda kazıno ashýdy tapsyrdy
NUR-SULTAN. QazAqparat – Qyrǵyzstan prezıdenti Sadyr Japarov kazınony eldiń barlyq aımaqtarynda ashýdy usyndy. Bul týraly QazAqparat «Kabar» agenttigine silteme jasap habarlaıdy.
«Zań jobasyna sáıkes, kazınolardy tek Ystyqkól jáne Batken oblystarynda ashý usynylyp otyr. Biraq men qazir apparatqa depýttardyń zań jobasyna búkil elde, ıaǵnı Bishkek pen barlyq oblys ortalyqtarynda kazıno ashý usynysyn engizýdi tapsyrdym», - dedi prezıdent.
Ol Qyrǵyzstanda kazıno 2015 jylǵa deıin jumys istegenin, ol kezde árbir azamattyń oǵan barýǵa quqyǵy bolǵanyn, jastardyń oıynǵa salynyp, kúndiz-túni aqshasynan aıyrylǵanyn eske saldy.
«Osyny syltaý qylǵan jekelegen depýtattar 2015 jyly kazınolardy jabatynyn aıtyp qorqytyp, olardyń ıelerinen birneshe mıllıon kóleminde aqsha bopsalaǵan. Biraq olar budan bas tartyp, qazynaǵa aqsha ákelip, 1,5 mln som lıtsenzııa satyp alǵanyn, árbir ústel men avtomat úshin salyq tólep júrgenin aıtty.
Sonda depýtattar kazınolardy jaýyp tastady. Men onyń ashylý ıdeıasyn nege qoldap otyrmyn? Zańǵa qyrǵyzstandyqtardyń kazınoǵa barýyna tyıym salatyn norma engizýdi usynamyn. Kazıno tek sheteldik týrıster úshin ǵana jumys isteıdi. Qazirgi kezde ekonomıkanyń quldyraýy baıqalyp otyr, biz el bıýdjetin tolyqtyrýdyń kez kelgen joldaryn izdeýimiz kerek. Onsyz járdemaqy, jalaqy, memlekttik qaryzdy tóleı almaımyz. Sondyqtan biz kazıno ashýymyz tıis», - dep túsindirip ótti Japarov.
