Sadyr Japarov Qyrǵyzstan Prezıdenti retinde resmı tirkeldi

BІShKEK. KABAR-QazAqparat – Qyrǵyzstannyń Saılaý jáne referendýmdar ótkizý jónindegi ortalyq komıssııasy 20 qańtar kúni «QR Prezıdentin merziminen buryn saılaýdyń nátıjeleri týraly» hattamany bekitti. Oǵan sáıkes, Qyrǵyzstanda merziminen tys Prezıdent saılaýy ótti dep tanyldy. QazAqparat bul týraly «Kabar» agenttigine silteme jasap habarlaıdy.

Elektorat tizimen jalpy sany 3 563 574 saılaýshy engizilgen. Onyń ishinde 10 qańtar kúni ótken Prezıdent saılaýyna 1 395 513 daýys berýshi qatysty, ıaǵnı 39,16%.

Prezıdenttikke úmitker Japarov Sadyr elektorattyń 1 105 248 daýysyna nemese barlyq saılaýshylardyń 79,20% qoldaýyna ıe boldy.

Ózge kandıdattar: Madýmarov Adahan - 94 741 daýys (6,79%), Tolbaev Babyrjan - 32 979 daýys (2,36%),

Arstanbek Myktybek - 23 583 daýys (1,69%), Segizbaev Abdıl - 20 335 daýys (1,46%), Tashov Imamıdın - 16 383 daýys (1,17%), Sooronkýlova Klara - 14 005 daýys (1,00%) jınady.

Aıta keteıik, prezıdenttikke barlyǵy 18 kandıdat úmitker boldy.

Saılaý bıýlletenindegi «Barlyǵyna qarsy» baǵanyna belgini daýys berýshilerdiń 18 673-i nemese 1,34% qoıǵan.

«Qyrǵyzstannyń Saılaý jáne referendýmdar ótkizý jónindegi ortalyq komıssııasy saılaýǵa qatysqan barlyq saılaýshylardyń 79,20% daýysyna ıe bolǵan Japarov Sadyr Nýrgojoevıchti Qyrǵyzstan Prezıdenti retinde tanydy. QR OSK qaýlysymen Japarov Sadyr Nýrgojaevıchti Qyrǵyzstan Prezıdenti retinde tirkeý, oǵan QR Prezıdenti retinde saılanýy týraly kýálikti berý, aıyryqsha belgiler – tósbelgi men onyń aty-jóni jáne laýazym merzimi jazylǵan Prezıdent Shtandartyn (týyn) tapsyrý belgilendi», - delingen aqparatta.

Eske salaıyq, bıylǵy 10 qańtarda Qyrǵyzstanda merziminen buryn Prezıdent saılaýy ótti.