Sadyr Japarov qyrǵyz eliniń burynǵy prezıdentteriniń basyn qosty
BІShKEK. KABAR-QazAqparat – «Kókeıdegi arman oryndaldy: máńgi beıbitshilik pen kelisim jolynda barlyq burynǵy prezıdentterdi bir dastarhan basyna jınaı aldym». Qyrǵyzstan basshysy Sadyr Japarov eldiń burǵynǵy prezıdentterimen kezdesý qorytyndysy jóninde áleýmettik jelidegi resmı paraqshasynda jazdy, dep habarlaıdy QazAqparat «Kabar» agenttigine silteme jasap.
«Aýyzbirshiliktiń joqtyǵy men bılikke degen bitpeıtin talastyń saldarynan biz ótken jyldardaǵy ımperııadan aıryldyq. Búgin Ortalyq Azııanyń bir buryshynda qalyp bara jatqandaımyz. Qazir soltústik pen ońtústikke, 7 oblysqa bólinip, árkimniń «kórpeni ózine qaraı tartýǵa» tyrysýyn bylaı qoıyp, eks-prezıdentterdiń jaqtaýshylary bolyp bóliný bar. Ókinishke qaraı, qyrǵyz eli jik-jikke bólinip ketti. Eger memleketimizdiń bolashaǵyn oılasaq, onda barlyǵyn biriktirýimiz qajet. (Kóshbasshylar birikpeı, olardy jaqtaýshylar birikpeıdi). Halyq kezinde saılaǵan burynǵy prezıdentterdi jınaý týraly oı kópten mazalaıtyn. Mine, oıymdy iske asyra aldym. Halqymyzdyń salty boıynsha dastarhan basyna jınadym. Olar eldiń bolashaǵy úshin ótkenniń bárin umytyp, meniń judyryqtaı jumylý týraly bastamama qoldaý bildirdi», - dep jazǵan Sadyr Japarov.
Qyrǵyz basshysynyń aıtýynsha, eks-prezıdentter ókpelerin aıtyp, óz qatelikterin de moıyndaǵan.
«Eń bastysy, olar bir-birin keshire aldy. Meniń maqsatym osy edi. Biraq, eń basty armanym – barlyq burynǵy prezıdentterdiń jaqtastary, barlyq jeti oblystyń halqy saıasattan alshaqtap, damý men ekonomıkalyq órkendeýdiń bir baǵytyn ustansa», - dep armanyn jetkizgen Qyrǵyzstan Prezıdenti el halqyn yntymaqqa shaqyrady. Ótkenge keshirimmen qarap, qara bastyń qamyn emes, memlekettiń bolashaǵyn oılaýǵa úndeıdi.
