Sadrıddın Ahmedovtyń jekpe-jegin qaıdan kórýge bolady

NUR-SULTAN. QazAqparat – Qazaqstandyq kásipqoı boksshy Sadrıddın Ahmedovtyń (9-0, 8KO) jekpe-jegin «Habar» arnasy tikeleı efırden kórsetetin boldy, dep habarlaıdy QazAqparat tilshisi.

«Qazaqstan kásipqoı boksy» VKontakte paraqshasynda habarlanǵandaı, Sadrıddın eki kúnnen keıin Kvebekte (Kanada) «Kovboı» laqap atty 31 jastaǵy meksıkalyq Djonnı Navarretemen (33-15-2, 15KO) kezdesedi. Aıqas 10 raýndqa eseptelgen. Jankúıerler jekpe-jekti «Habar» arnasynan 26 qazan kúni saǵat 07.00-de kóre alady.

Eske sala ketsek, jeńilip kórmegen qazaqstandyq Sadrıddın Ahmedov (9-0, 8KO) kelesi kezdesýin 25 qazanda Kanadanyń Kvebek qalasynda meksıkalyqqa qarsy ótkizetini habarlanǵan bolatyn. Sońǵy ret 21 jastaǵy qazaqstandyq nokaýtshy Tetfor Mındegi (Kanada) boks keshi aıasynda óner kórsetip, rıngte meksıkalyq Danıel Vega Kotany (14-3-1, 11 KO) tehnıkalyq nokaýtpen 90 sekýndta jeńgen edi.