Sadrıddın Ahmedovtiń Almatyda ótetin tıtýldyq jekpe-jektegi qarsylasy anyqtaldy
Buǵan deıin 24 naýryz kúni «Almaty Arena» kesheninde kásipqoı boks keshi ótetinin jazǵan edik. Oǵan Qazaqstan, Reseı, Afrıka elderi, Venesýela, Ózbekstan, Belarýs, Grýzııa jáne basqa da memleketterdiń boksshylary qatysatyny josparlanǵan.
Búgin «Eye of the Tiger Management» promoýterlik kompanııasynyń boksshysy Sadrıddın Ahmedovke kim qarsylas bolatyny anyqtaldy. «Qazaqstannyń kásipqoı boksy» BoxRec.com saıtyna silteme jasap habarlaýynsha, birinshi orta salmaqtaǵy WBC Asia tıtýly úshin aıqas Ahmedov pen 25 jastaǵy Indonezııa ókili Djon Rýba (17-5-1, 9KO) arasynda ótedi. Jekpe-jek 10 raýndqa eseptelgen.
Eske salsaq, Sadrıddın Ahmedov 26 qańtar kúni Kanadanyń Monreal qalasynda ótken kezdesýinde meksıkalyq Abraham Hýaresti (13-2, 5KO) nokaýtqa túsirip, jastar arasyndaǵy WBC beldigin jeńip alǵan bolatyn.
«SULEIMEN Promotions» promoýterlik kompanııasynyń aqparatyna sáıkes, «Almaty Arenadaǵy» boks keshinde barlyǵy 8 aıqas ótedi.
«Keshtiń basty tıtýldyq kezdesýleri - jeńilip kórmegen Aıdos Erbosynuly men Nursultan Jańabaevtyń qatysýymen ótetin jekpe-jekter bolmaq. Aıdos Erbosynuly (10-0-8KO) ekinshi orta salmaqta ońtústikafrıkalyq Lýkas Ndafolýmmen (15-1-6KO) qolǵap túıistiredi. Atalmysh kezdesýde WBA INTERNATIONAL chempıondyq beldigi tigilip, WBC ASIA ı WBO GLOBAL beldigi qorǵalmaq. Lýkas Ndafolýmnyń laqap aty «Kúıretýshi». Al Nursultan Jańabaev (6-0-4KO) WBA INTERCONTINENTAL tıtýly úshin Venesýela eliniń boksshysy Ivan Matýtemen (28-1-23 KO) shyǵady. 25 jastaǵy venesýelalyq Ivan Matýte (laqap aty «El Demoledor») 28 aıqas ótkizip, 23-in nokaýtpen aıaqtaǵan», - delingen promoýterlik kompanııasy habarlamasynda.
Basty aıqastardyń anderkartynda Dastan Sádýuly, (1-0, 1 KO) Eskendir Harsan, Ashat Jantursynov, Dıas Tastemirov (3-0, 3KO) shyǵady.