Sadrıddın Ahmedov meksıkalyq «Kovboıdy» nokaýtqa jiberdi

NUR-SULTAN. QazAqparat – Qazaqstandyq Sadrıddın Ahmedov (10-0, 9KO) kásipqoı bokstaǵy onynshy jekpe-jegin ótkizdi, dep habarlaıdy QazAqparat VKontakte áleýmettik jelisindegi «Qazaqstannyń kásipqoı boksy» paraqshasyna silteme jasap.

S.Ahmedov Kanadanyń Kvebek qalasynda ótken boks keshinde óner kórsetti. Birinshi orta salmaqtaǵy aıqasta onyń qarsylasy meksıkalyq «Kovboı», 31 jastaǵy Djonnı Navarrete (33-15-2, 15KO) boldy. Jekpe-jek segiz raýndqa esepteldi.

Qazaqstandyq sportshy qarsylasynyń profı-rıngtegi úlken jeńisterinen seskengen joq. Kerisinshe, bar tájirıbesin kórsetýge tyrysyp baqty. Nátıjesinde ony tehnıkalyq nokaýtqa jiberip, Navarrette sońǵy raýndqa shyqpaı qaldy.

Osylaısha, Sadrıddın Ahmedov kásipqoı bokstaǵy onynshy jeńisine qol jetkizdi, onyń toǵyzyn merziminen buryn aıaqtady. Ol WBC nusqasy boıynsha jastar arasyndaǵy álem chempıony jáne birinshi jartylaı salmaqta Azııanyń WBC chempıony. Jasy – 21-de.

Al Navarrete aıqastarynyń kóbin óz otanynda ótkizgen. Onyń qarsylastary birinshi orta salmaqtaǵy WBO álem chempıony Haıme Mýngıe (34-0, 27KO) men Saýl Alvarestiń baýyry Ramon Alvares (28-8-3, 16KO) bolǵan. Meksıkalyq boksshy olarmen eki retten kezdesip, kóbinde jeńilgen. Bir márte Ramon Alvarespen teń túsken.

Aıta keteıik, Boxrec.com málimeti boıynsha, qazaqstandyq sportshynyń kelesi aıqasy josparlanyp qoıǵan. Ol rıngke 7 jeltoqsan kúni Kanadanyń Monreal qalasynda qaıta shyǵady. Qarsylasy ázirge belgisiz.