Sadrıddın Ahmedov kelesi jekpe-jegin meksıkalyq «Kovboımen» ótkizedi

NUR-SULTAN. QazAqparat – Kásipqoı boksta jeńilip kórmegen qazaqstandyq Sadrıddın Ahmedov (9-0, 8KO) kelesi kezdesýin 25 qazanda Kanadanyń Kvebek qalasynda ótkizetin boldy, dep habarlaıdy QazAqparat tilshisi.

«Qazaqstan kásipqoı boksy» VKontakte paraqshasynan habarlanǵandaı, jastar arasyndaǵy WBC nusqasy boıynsha álem chempıony jáne birinshi jartylaı salmaqta Azııanyń WBC chempıony, 21 jastaǵy Sadrıddın Ahmedov «Kovboı» laqap atty 31 jastaǵy meksıkalyq Djonnı Navarretemen (33-15-2, 15KO) kezdesedi.

«Navarrete aıqastarynyń kóbin óz otanynda ótkizgen. Ol kezdesken qarsylastardyń ishinde birinshi orta salmaqtaǵy WBO álem chempıony Haıme Mýngıe (34-0, 27KO) men Saýl Alvarestiń baýyry Ramon Alvaresti (28-8-3, 16KO) atap ótýge bolady. Meksıkalyq atalǵan qarsylastarymen eki ret kezdesip, kóbinde jeńilgen. Bir ret Ramon Alvarespen teń túsken», - delingen habarlamada.

Sadrıddın Ahmedovtyń aldaǵy aıqasy 10 raýndqa eseptelgen.

Eske sala ketsek, osy jyldyń maýsymynda Sadrıddın Ahmedov kásibı mansabynda toǵyzynshy jekpe-jegin ótkizip, meksıkalyq Danıel Vega Kotany (14-3-1, 11 KO) tehnıkalyq nokaýtpen 90 sekýndta jeńgen bolatyn.