Sadrıddın Ahmedov kelesi aıqasyn jyl sońyna deıin ótkizedi

NUR-SULTAN. QazAqparat – Kásipqoı rıngte jeńilip kórmegen qazaqstandyq boksshy, birinshi orta salmaqtaǵy WBC Youth álem chempıony Sadrıddın Ahmedov (11-0, 10 KO) kelesi aıqasyn jyl sońyna deıin ótkizýdi josparlap otyr, dep habarlaıdy QazAqparat.

Bul týraly boksshy Instagram-da jazyp, jattyǵý kezindegi vıdeomen bólisti.

«Jeltoqsandaǵy jekpe-jekke daıyndalyp jatyrmyz, jattyǵý qarqyndy ári sátti ótýde», - dedi ol.

Sadrıddınniń sońǵy jekpe-jegi byltyr 7 jeltoqsanda Monrealda (Kanada) ótken bolatyn. Ol jetinshi raýndta argentınalyq Hose Antonıo Vılıalobosty (12-6-2, 7 KO) nokaýtqa jibergen edi. Qazaqstandyq boksshynyń kásipqoı rıngtegi jumysyn kanadalyq Eye of the Tiger Management promoýterlik kompanııasy júrgizedi.