Sadrıddın Ahmedov Kanadada «Jyl jańalyǵy» atandy
Qazaqstan kásipqoı boks paraqshasynyń málimetinshe, Netboxe.com 21 jastaǵy qazaqstandyq boksshy, birinshi orta salmaqtaǵy BC Asia jáne WBC Youth World chempıony Sadrıddın Ahmedovty jyl jańalyǵy dep tanyǵan.
«Qazaqstannyń birinshi orta salmaqtaǵy sportshysy Kanadada ózine artylǵan úmitti tolyq aqtady. 2016 jylǵy jasóspirimder arasyndaǵy álem chempıony Sadrıddın Ahmedov 18 jasynda-aq jasyndaı jarqyldap, áýesqoılar arasynda úzdik atandy.
2018 jyly Sadrıddın kásipqoı boksqa aýysty. Bul kezde bozbala áýesqoı boksta 251 jekpe-jek ótkizip, onyń 241-inde jeńiske jetken bolatyn. Nurzat Sabyrov jáne Batyr Júkembaev sekildi qazaqstandyq boksshylarmen jumys istep úlgergen Kamıl Estefannyń Eye of the Tiger Management atty kanadalyq kompanııasy Ahmedovty qýana-qýana óz qamqorlyǵyna aldy.
Qazir Sadrıddındi Mark Remsı jattyqtyryp júr. Joǵary tehnıkany meńgergen Ahmedovtyń soqqysy óte kúshti. Remsıdiń aıtýynsha, onyń shákirti birneshe jylda álem chempıony atanady.
Sadrıddın osy ýaqytqa deıin kásipqoı boksta ótkizgen 11 aıqastyń barlyǵynda jeńiske jetti. Qazaqstandyq sportshynyń dańq jolyndaǵy jetistikteri tańǵaldyrady», dep jazady basylym.