Sadrıddın Ahmedov Almatyda WBC tıtýly úshin aıqasady
«Assalaýmaǵaleıkým barsha qazaq boks jankúıerleri! Sizdermen ózimniń jaqsy jańalyǵymdy bóliskim kelip otyr. Alla qalasa 24 naýryzda qazaq elinde, ıaǵnı Almaty tórinde ózimniń 8-shi jekpe-jegimdi ótkizemin. Barlyǵyńyzdy naǵyz qazaq boksyn kórýge shaqyramyn jáne sizdermen naǵyz úlken shoýdy bóliskim keledi. Qazirge bar jańylyqtarymyz osy, daıyndyq jaqsy deńgeıde ótip jatyr. Kelip koldaý kórsetip, barlyq qazaq boksshylaryna jankúıer bolǵandaryńyzdy qalaımyz. Jekpe-jek «Almaty Arenada» ótedi, bul kezdesýde eresekter arasyndaǵy WBC Asia belbeýi sarapqa salynatyn bolady», - dep jazdy boksshy.
VKontakte áleýmettik jelisindegi «Qazaqstannyń kásipqoı boksy» paraqshasynda jazylǵandaı, Ahmedovtiń qarsylasy ázirge belgisiz.
Eske sala keteıik, 26 qańtarda Kanadanyń Monreal qalasynda ótken aldyńǵy jekpe-jeginde Sadrıddın meksıkalyq Abraham Hýaresti (13-2, 5KO) tórtinshi raýndta nokaýtqa jiberip, birinshi orta salmaqta jastar arasyndaǵy WBC tujyrymy boıynsha álem chempıony atanǵan bolatyn.
Boksshynyń aıtýly jekpe-jegin Almatyda ótkizýi tegin emes. Sadrıddın basqa da tanymal daryn ıelerimen birge otandyq týrızmge úles qosýǵa bel býyp otyr. Buǵan deıin onyń Qazaqstan týrızminiń elshisi atanǵanyn habarlaǵan edik.