Sadyr Japarov jumys saparymen Qazaqstanǵa keledi
ASTANA. KAZINFORM – Qyrǵyzstan prezıdenti Sadyr Japarov 17 qyrkúıekte «Ortalyq Azııa – Germanııa» memleket basshylarynyń ekinshi otyrysyna qatysý úshin Qazaqstanǵa jumys saparymen keledi.
QR Prezıdenti Ákimshiliginiń Syrtqy saıasat bóliminiń meńgerýshisi Muratbek Ázimbaqıevtiń aıtýynsha, sapar aıasynda Qyrǵyzstan basshysy Ortalyq Azııa memleketteri basshylary men GFR Federaldy kantsleriniń ekinshi kezdesýine qatysady.
Taraptar óńirlik kún tártibiniń ózekti máselelerin, onyń ishinde Ortalyq Azııa óńiriniń Germanııa Respýblıkasymen barlyq salalardaǵy yntymaqtastyǵyn keńeıtýdi talqylaıdy.
- Sonymen qatar Sadyr Japarov Ortalyq Azııa elderi prezıdentteriniń nemis kásipkerlerimen kezdesýine qatysady, nemis bıznes qaýymdastyǵymen jeke kezdesý ótkizedi, sondaı-aq Germanııanyń Federaldy kantsleri Olaf Sholtspen ekijaqty kelissózder júrgizedi, - dedi resmı ókil.
Buǵan deıin Germanııa Federaldy Kantsleri Olaf Sholts Memleket basshysy Qasym-Jomart Toqaevtyń shaqyrýymen Qazaqstanǵa resmı saparmen keletini habarlanǵan.
Germanııa Federaldy Kantsleri Olaf Sholts «Ortalyq Azııa + Germanııa» sammıtine qatysady, onyń barysynda keń aýqymdaǵy strategııalyq yntymaqtastyq pen seriktestik máselelerin, sonyń ishinde saýda-ekonomıkalyq ózara is-qımyl jáne birlesken ınvestıtsııalyq jobalardy júzege asyrýdy talqylaý josparlanǵan.
