Sadyr Japarov Qyrǵyzstan UQShU-ǵa tóraǵalyq etken kezde basymdyq beretin baǵyttardy atady
ASTANA. KAZINFORM – Qyrǵyzstan 2025 jyly Kıberqaýipsizdik boıynsha halyqaralyq konferentsııa ótkizedi. Bul týraly UQShU Ujymdyq qaýipsizdik keńesi kezekti sessııasynyń keńeıtilgen quramdaǵy otyrysynda Qyrǵyzstan prezıdenti Sadyr Japarov aıtty.
«Kelesi jyly Qyrǵyz Respýblıkasynyń UQShU-ǵa tóraǵalyq etýi - biz úshin úlken mártebe. Osy qurmetti mıssııany qabyldaýǵa daıyn ekenimdi bildiremin. Qyrǵyzstan tóraǵa retinde uıymymyzdyń údemeli damýyn qamtamasyz etý úshin barlyq qajetti kúsh-jigerdi jumsaıdy», - dedi Qyrǵyzstan Prezıdenti.
Sonymen qatar ol 2025 jyly Qyrǵyzstan qandaı baǵyttarǵa nazar aýdaratyndyǵyn aıtty.
Atap aıtqanda, saıası qujattardy qabyldaý tájirıbesin odan ary qoldaý jolymen syrtqy saıası ózara is-qımyldy nyǵaıtady. Normatıvtik-quqyqtyq bazany jetildirý arqyly ujymdyq kúshterdiń daıyndyǵyn arttyrý jolymen áskerı qurylymdardy damytady. Terrorıstik jáne ekstremıstik maqsattarǵa aqparattyq tehnologııalardy paıdalanýdyń jolyn birlese kesýge mán beredi. Aqparattyq qaýipsizdik salasyndaǵy yntymaqtastyqtyń ózektiligi artyp kele jatqanyn eskere otyryp, 2025 jyly Kıberqaýipsizdik boıynsha halyqaralyq konferentsı ótkizedi.
Sadyr Japarov sóz sońynda Qazaqstan tarapynan bıyl UQShU tóraǵalyǵyn tabysty ótkizýimen quttyqtady.
«Ujymdyq qaýipsizdik keńesiniń kezekti sessııasyn 2025 jyldyń 4-toqsanynda Qyrǵyz Respýblıkasynda ótkizýdi usynamyn», - dedi ol.