Sadyr Japarov Qyrǵyzstan ánuranyn ózgertý bastamasyn qoldady

BІShKEK. KAZINFORM – Qyrǵyzstan prezıdenti Sadyr Japarov «Kabar» agenttigine bergen suhbatynda Jogorký Kenesh spıkeri Nurlanbek Shakıevtiń memlekettik ánurandy ózgertý týraly usynysyna qatysty pikirin bildirdi, dep habarlaıdy Kazinform menshikti tilshisi.

Qyrǵyz basshysy bul ıdeıany qoldaý qajet dep sanaıdy.

«Ánurandy ózgertsek jaqsy bolar edi. Ony jańartsaq, nesi jaman ? Qazirgi Ánuranymyz osydan 33 jyl buryn táýelsizdik alǵan tusta jazylǵan. Ánuran avtorlary el azattyq pen táýelsizdikke qol jetkizip, qyrǵyz halqynyń taǵdyry solardyń qolynda ekenin qýanyshpen, tolqýmen jazdy. Sodan beri 33 jyl ótti. Biz tolyqqandy memleketke aınaldyq. Bizdi búkil álem biledi. Júz jyldan keıin azattyq alyp, táýelsiz el boldyq dep jyrlaı bermekpiz be? Táýelsiz memleket ekenimizdi, bes myń jyldyq tarıhy bar halyq ekenimizdi jyrlap, jastardy, bolashaq urpaqty jigerlendiretin Ánuran nege jazbasqa? Árıne, qazirgi ánuranymyz umytylmaıdy. Ol respýblıkamyzdyń tuńǵysh ánurany retinde tarıh muraǵatynda qalady», – dedi ol.

Sadyr Japarov buǵan deıin keıbir demagogtar men popýlısterdiń de týdy ózgertý ıdeıasyna qarsy bolǵanyn eske saldy.

«Qazirgi týymyz jaman ba? Ol burynǵymen salystyrǵanda jaqsyraq boldy. Eski jalaýdaǵy kún sımvoly ne kúnbaǵysqa, ne «aǵash tilgishke» uqsaıtyn. Endi bul kún sáýlesi ekeni birden belgili boldy. Ol jarqyrap tur», - dep túsindirdi prezıdent.

Buǵan deıin Jogorký Kenesh spıkeri Nurlanbek Shakıev Qyrǵyzstan ánuranyn qaıta jazýdy usynǵany habarlanǵan bolatyn.

Eske sala ketsek, Qyrǵyzstan Prezıdenti Sadyr Japarov «QR memlekettik rámizderi týraly» QR zańyna ózgerister men tolyqtyrýlar engizý týraly» 20 jeltoqsanda Jogorký Kenesh qabyldaǵan zańǵa qol qoıdy.