Sadyr Japarov Qasym-Jomart Toqaevty Quryltaı saılaýynyń sátti ótýimen quttyqtady
BІShKEK. KAZINFORM — Qyrǵyzstan Respýblıkasynyń Prezıdenti Sadyr Japarov Qazaqstan Respýblıkasynyń Prezıdenti Qasym-Jomart Toqaevty jáne baýyrlas qazaq halqyn Quryltaı saılaýynyń sátti ótýimen quttyqtady, dep jazady Qyrǵyzstan Prezıdentiniń ákimshiligi.
— Azamattardyń erkin tańdaýyna negizdelgen Quryltaı Qazaqstannyń memlekettiligin nyǵaıtyp, quqyqtyq jáne qoǵamdyq-saıası ınstıtýttardy jetildirýge, sondaı-aq eldiń turaqty áleýmettik-ekonomıkalyq damýyna eleýli úles qosatynyna senimdimin. Sizdiń basshylyǵyńyzben júzege asyrylyp jatqan júıeli reformalar eldiń uzaq merzimdi múddesine saı kelip, halyqtyń ál-aýqatyn arttyrýǵa jáne memlekettiń odan ári órkendeýine baǵyttalǵanyn atap ótkim keledi. Qyrǵyz-qazaq strategııalyq seriktestigi men odaqtastyǵy eki el halyqtarynyń ıgiligi úshin, sondaı-aq búkil Ortalyq Azııadaǵy beıbitshilik, turaqtylyq pen damýǵa úles qosa otyryp, odan ári nyǵaıa beretinine senemin. Sizge zor densaýlyq, amandyq jáne memlekettik qyzmetińizge tabys, al baýyrlas Qazaqstan halqyna beıbitshilik pen órkendeý tileımin, — delingen Prezıdent Sadyr Japarovtyń quttyqtaýynda.
Aıta keteıik, Qazaqstanda Quryltaı depýtattaryn saılaý boıynsha daýys berý aıaqtaldy. Jergilikti ýaqyt boıynsha saǵat 20:00-de el aýmaǵyndaǵy saılaý ýchaskeleri jabylyp, komıssııalar daýystardy sanaýǵa kiristi.
20:00-degi jaǵdaı boıynsha Quryltaı depýtattaryn saılaýynda daýys berýshiler tizimine engizilgen 9 mln 350 myńnan astam saılaýshy óz tańdaýyn jasady.
