Sadyr Japarov eks-prezıdent Asqar Aqaev jumysyndaǵy basty qatelikterdi atady
ASTANA. KAZINFORM — Qyrǵyzstan prezıdenti Sadyr Japarov «Kabar» agenttigine bergen suhbatynda Asqar Aqaevtyń bıligi kezinde jibergen qatelikteri týraly aıtty.
Qyrǵyzstan basshysynyń aıtýynsha, eldiń tuńǵysh prezıdenti Asqar Aqaevtyń basty qatelikteriniń biri — eldegi jekeshelendirý úderisin baqylaı almaǵany.
— Qolynda aqsha men bılik barlar halyqtyń múlkin talan-tarajǵa saldy. Jumys istep turǵan zaýyttar men fabrıkalar joıylyp, stanoktar shetelge satyldy, — dedi ol.
Sadyr Japarov quldyraǵan aýyl sharýashylyǵy máselesin de atap ótti.
— Aýyl sharýashylyǵy máselesinde Aqaev kináli emes, sebebi ol agronom emes, ǵalym. Aýyl sharýashylyǵynyń joıylýyna biliksiz demagog mınıstrdi kináláý kerek. Bul salaǵa marqum Jumǵalbek Amanbaev sııaqty myqty mınıstr taǵaıyndaý kerek edi. Osylaısha Asqar Aqaıuly kadr tańdaýda qatelesti, — dedi Sadyr Japarov.
Asqar Aqaevtyń úshinshi basty qateligi — ol halyqty aqyry ózin qýyp jiberetin dárejege jetkizgeni.
— Eldi 10 jyl basqarǵan soń abyroımen ketýi kerek edi. Álemdik tájirıbe kórsetkendeı, adam prezıdent bolyp uzaq qyzmet etpeýi kerek. Eger Asqar Aqaev qýyp jiberýge jetkizbeı, ornyn bosatqanda onyń tuńǵysh prezıdent jáne eks-prezıdent retindegi portretteri qazir barlyq jerde ilýli turar edi. Eger siz 99 jaqsylyq jasap, bir qatelik jasasańyz, halyq ony keshirmeıdi. Adamdardyń tabıǵaty sondaı, oǵan renjýdiń qajeti joq. Jaqsylyq tez umytylady, al jamandyq eshqashan umytylmaıdy, dedi Qyrǵyz basshysy.
Buǵan deıin habarlaǵanymyzdaı, Qyrǵyzstannyń burynǵy memleket basshysy Asqar Aqaev el parlamentine eks-prezıdent mártebesin qaıtarýdy surap hat joldaǵan bolatyn.
5 qyrkúıekte ótinish Qyrǵyz Respýblıkasy Jogorký Keneshiniń Konstıtýtsııalyq zańnama, memlekettik qurylys, sot-quqyqtyq máseleler jáne reglament komıtetiniń qaraýyna jiberildi.
Mınıstrler kabıneti tóraǵasynyń orynbasary Edil Baısalovtyń aıtýynsha, Asqar Aqaevtyń haty durys mekenjaıǵa baǵyttalmaǵan.
Keıin Qyrǵyzstan prezıdenti Sadyr Japarov Asqar Aqaevtyń úndeýine jaýap berdi.
24 qyrkúıekte Qyrǵyz Respýblıkasy Jogorký Keneshiniń Konstıtýtsııalyq zańnama, memlekettik qurylym, sot-quqyqtyq máseleler jáne reglament jónindegi komıteti A.Aqaevtyń ótinishin qanaǵattandyrýdan bas tartý týraly sheshim qabyldady.
Bir kún buryn Jogorký Kenesh otyrysynda depýtattar eks-prezıdent mártebesin qalpyna keltirýge qarsy daýys bergen bolatyn.
