Sádibek Túgel úgit-nasıhat jumystaryn túngi klýbtan bastady

NUR-SULTAN. QazAqparat - «Uly Dala qyrandary» respýblıkalyq qoǵamdyq qozǵalysynan QR Prezıdenttigine úmitker Sádibek Túgel elordadaǵy úsh túngi klýbta ótkizilgen qoǵamdyq reıdke qatysty, dep habarlaıdy QazAqparat tilshisi.

Sádibek Túgel bıylǵy jastar jylynda jas býynnyń bos ýaqytyn qalaı ótkizetindigin kózimen kórip, olarǵa adamgershilik pen izgilik jaıly, otansúıgishtik, eldik máselesi turǵysynda sóz qozǵady.

QR Prezıdenttigine úmitker, qoǵam qaıratkeri, jýrnalıst-jazýshy ulttyq at sporty oıyndarynyń negizin qalaýshy Sádibek Túgel saılaýaldy baǵdarlamasynda basym baǵyttardyń biri jastardyń ulttyq qundylyqtardy ulyqtaýǵa negizdelgendikten mundaı is-sharalardyń ótkizilýi mańyzdy dep sanaıdy.

Jastarmen sóılesken kezde ol bos ýaqytty tıimdi paıdalaný men kóńildi ótkizýdiń de qajettigine toqtala kele, jastar qoǵamnyń qozǵaýshy kúshi bolǵandyqtan ar-namysty bárinen bıik qoıý qajet dep túıindedi.

Aıta ketsek, búgin Sádibek Túgel saılaýaldy baǵdarlamasyn jarııa etken bolatyn.

Eske sala ketsek, keshe QR Prezıdenttigine kandıdat Qasym-Jomart Toqaev Respýblıkalyq qoǵamdyq shtabqa kelip, qyzmetkerlermen kezdesken bolatyn.

Al, QR Prezıdenttigine kandıdat Jambyl Ahmetbekov resmı saıtynda saılaýaldy tuǵyrnamasyn jarııalady.

Sonymen qatar, keshe «Aýyl» xalyqtyq-demokratııalyq patrıottyq partııasynyń saılaýaldy shtabynda jıyn ótti. Onda prezıdenttikke kandıdat Tóleýtaı Raqymbekov óziniń saılaýaldy tuǵyrnamasyn tanystyrdy.

Úmitkerler halyqpen kezdesip, daýys jınaý úshin úgit-nasıhat jumystaryna kirisken. Atap aıtqanda, «Aq jol» partııasynan úmitker Danııa Espaeva Almaty bazarynda jumys isteıtin kásipkerlermen kezdesti.

Al Ámirjan Qosanov saılaýaldy shtabymen Soltústik Qazaqstandy aralap júr.