Sádi-Bek Túgel: Kandıdat retinde Qasym-Jomart Toqaevty jeńisimen quttyqtaımyn

NUR-SULTAN. QazAqparat - «Uly Dala qyrandary» respýblıkalyq qoǵamdyq qozǵalysynan QR Prezıdenttigine kandıdat Sádibek Túgel saılaýdyń exit poll boıynsha qorytyndysyna óz oıyn bildirdi, dep habarlaıdy QazAqparat.

«Qasym-Jomart Toqaev exit poll qorytyndysy boıynsha 70,13% alǵanyn estidik. Kandıdattardyń biri retinde ony shyn júrekten quttyqtaımyn», - dedi ol.

S. Túgeldiń pikirinshe, saılaý ashyq ári ádil ótti. Qazaqstandyqtar ózderiniń azamattyq ustanymyn bildirdi. «Men halyqtyń uıymshyldyǵyn, belsendiligin, sonymen qatar demokratııaǵa betburysyn baıqadym. Bul saılaý bolǵandyqtan da, onda jeńis te, jeńilýshi jaq ta bar. Saılaý ádil ótti. Ásirese, halyqtyń belsendiligine tántimin. Munyń ózi úlken jetistik», dedi ol.

Eske sala keteıik, «Qoǵamdyq pikir» ınstıtýtynyń málimetine sáıkes, exit poll nátıjesi boıynsha 9 maýsymda ótken QR Prezıdentiniń kezekten tys saılaýynda qazaqstandyqtardyń 70,13% kandıdat Qasym-Jomart Toqaevqa daýys bergen.